KTM tan Pedrosa a lo kir dawn

Dani Pedrosa chu August 6-8 chhunga neih tur MotoGP Styrian Grand Prix-ah a inlan dawn, kum 2018 a bike intlansiakna sang ber chawlhsan tawhtu hi wildcard hmanga inlan tur niin KTM tan a tlan ang.

Kum 35 mi Pedrosa hian tun hmain season 13 zet chu MotoGP-ah hian hun a lo hmang tawh. Intlansiak vawi 31 zetah hnehna a chang a, champion chiah lo mah se driver championship-ah hian ṭum thum chu pahnihna a ni.

Spanish rider hian kum 2018 khan MotGP a chawlhsan a, bike khalh erawh a tawpsan nghal mai lo - KTM tan factory test rider a ni a, inelna sangah lo kir leh thut pawh ni se a ngaihtuahawm lo ang.

Pedrosa chuan, "A eng emaw zawng tak chuan a huphurhawm a, a phurawm tel bawk. MotoGP a nih tawh chuan engkim mai hi a ṭha thei ang bera tih a ngai ṭhin, inelna pakhat ka hmachhawn turah pawh hian a ṭha thei ang bera tih ka tum ang," tiin a sawi.