Lawm hlawh tawk loa inngai Wijnaldum

Liverpool midfielder Georginio Wijnaldum chuan Merseyside club-a a cham chhungin a beisei anga fans thlawpna leh hmangaihna a dawn tawk loh thu a sawi chhuak.

Kum 30 mi midfielder hian nipui transfer-ah a contract a zawh rualin Liverpool a chhuahsan a, Barcelona pan tura ngaih a nih laiin hlawh lama ngam sang zawk Paris St-Germain a zawm.

Liverpool tana Premier League leh Champions League nomawi chawitu coach chuan, "Hmangaih leh lawm hlawh tawk loa inhriat chang ka nei a, ka khelhpui leh Melwood (Liverpool training ground) lam aṭangin erawh a ni lo.

"Anni chuan an vaiin min hmangaih a, kei pawn ka hmangaih em em. Social media hi a sawi lan loh theih loh a ni - result ṭhat loh apiangin social media lama fan-ten min dem a, chhuah ka duh vanga rilru pe tawk lo ang hialin min sawi.

"Liverpool hi ka tana a hlut em avang leh stadium-a inkhel en ṭhin fan-ten min thlawp nasat em avangin Reds tan training leh inkhelhna zawng zawngah ka theihtawp ka chhuah ṭhin," a ti.

Dutch midfielder chuan sawi zawmin, "Ka ngaihdanah chuan stadium leh social media-a fan-te hi an danglam hlak. A hmun ngeia kan inkhel en ṭhinte chuan min thlawp reng a, boruak pangngaia stadium-a an lo kir leh pawh khan ka chhuak dawn tih hre mah se min thlawpna hlir an ti lang.

"Social media-ah ve thung chuan kan chak loh apiangin dem ka hlawh a ni," a ti a, social media lama phun ṭhin fan-te a dem.

Gini hi a thil sawi avangin fans tam takin an sawisel zui a, Liverpool legend Jamie Carragher pawhin fan-te thlavang hauhin Dutch midfielder chu a sawi loh tur sawiah a ngai.

Carragher chuan, "Gini hi ka duhsak em em a, mahse, a thil sawi erawh a ṭha ka ti lo. Club zawng zawngin social media-ah chuan mi â tak tak kan nei vek a, an thusawiin min tibuai dawn a nih chuan notifications 'off' emaw a 'app' zawk delete mai kha tih tur a ni.

"Liverpool-ah hlawh tam zawk a duh a, club-in an remti lo a, hei hi football chu a ni," tiin a sawi a, Gini-a'n a chhuah chhan anga fans a sawi chu a dik lo tih a sawi.