Mipa boxer 3 inlan tawh an chak lo vek

Tokyo Olympic-ah Indian boxer pathum an inlan tawh a, an chak lo vek. Nimin tlai khan Ashish Kumar chuan a khingpui Chinese boxer Tuoheta Erbieke chu 5-0 in an hneh lo.

India hian tun ṭumah hian mipa boxer panga a tir a, Ashish hma hian Manish Kaushik leh Vikas Krishan ten an khingpui Great Britain boxer Luke McCormack leh Japanese boxer Okazawa Quincy Mensah te an hneh lo.

Himachal Pradesh boxer Ashish hi round 1-ah a che chhe hran lo a, amaherawhchu judge pangaten Tuoheta Erbieke an chaktir vek. Round 2 pawh a danglam lo, Ashish-a'n ṭha taka hnek fuh nei mah se Erbieke bawk a ding chang.

Ashish tan chak turin round thumnaah Tuoheta Erbieke hi a knockout a ṭul a, amaherawhchu Chinese boxer tho a din chan avangin Erbieke hi unanimous decision-in an chak.

India mipa boxer zingah flyweight ranking-a number 1 Amit Panghal leh super heavyweight category-a inlan tur Satish Kumar te chiah an dam tawh. Hmeichhe lam erawh boxer palite an dam kim a, Mary Kom-i'n a match hmasa berah hnehna a chang.

Vawiin chawhma dar 10:57 hian Assamese boxer Lovlina Borgohain chuan German boxer Nadine Apetz a hmachhawn dawn a, a chak zawk hian quarterfinal an lut ang.