Bengaluru tan Udanta a rinawm

Manipur winger Udanta Singh chuan Bengaluru-a cham chhunzawm zel turin contract thar a ziak a, kum 2014 aṭanga a lo khelh tawhna club-ah hian kum thum chhung atan contract thar a ziak a ni. 

India tana vawi 27 inlan tawh Udanta hi Tata Football Academy aṭanga inzir chhuak a ni a, TFA aṭanga a chhuah kumah Bengaluru hi a zawm nghal. Kum 2016 khan Udanta hian Bengaluru aṭangin Mumbai City chu loan-in a zawm a, ISL-a a season hmasa ber a hmang - hetihlai hian Bengaluru hian I League an la khel.

Bengaluru tana nomawi chawi theih zawng zawng chawi tawhtu winger hian a contract hmasaah khan season khatah nuai 55 a hlawh a, a contract thar hlut zawng hi puan zar ni lo mah se a contract hmasa ai chuan hlu zawk ngei tura ngaih a ni.