USA mipa basketball team an chak lo!

Basketball a nih chuan mitthlaah United States a lo lang nghal - an mipa team phei chu chak reng tur a rinkai an ni. Mahse, USA mipa team hi Tokyo Olympic an group match hmasa berah France lakah 83-76 in an chak lo.

Olympic bikah USA hi a zawna match 25 chak tluang lai an ni a, tun hnai Olympic hnuhnung pasarihah vawi ruk an champion thei. Amaherawhchu nimin zing khan 2004 hnua an chak lohna hmasa ber an tawng baw ta.

US team-ah hian Kevin Durant leh Jrue Holiday te an awm a, anni pahnih bakah hian Devin Booker, Khris Middleton, Jayson Tatum leh Fraymond Green te an awm, mahse an chak miau si lo.

USA coach coach Gregg Popovich chuan, "Minute 40 chhung khan keini aiin an khel ṭha zawk, a ti chhe zawk nih chuan chak theih a ni lo. Kan chak lohna lai hi a rang thei ang berin kan siamṭha tur a ni ang," a ti.

Olympic bikah American mipa team hian match 144 an khel tawh, chung zingah chuan vawi ruk chauh chak loh an nei. Basketball ngaihsanna leh chawi larna ram a ni a, player pawh an nei ṭha. An tan chuan ram leh ram inelnaa chak loh hi mualphona a tling.

Inelna neih ṭan hma aṭangin US hian result ṭha an nei hleithei lo. Inbuatsaih nana an hmachhawn Nigeria leh Australia lakah an tlawm a, inelna tak neih hnuah pawh an mangchhia hian a la kiansan lo tihna a ni.

Group A inkhel dangah Czech Republic chuan Iran lakah 84-78 in hnehna an lo chang ve thung. July 28, Nilaini zing dar 5:30 hian US leh Iran hi an inhmachhawn leh dawn; Czech leh France an intum ve leh bawk ang.