Malen-a'n Dortmund a zawm dawn

Netherlands forward Donyell Malen-a'n PSV aṭangin Borussia Dortmund a zawm dawn. German club-in Dutch forward manah hian euro maktaduai 30 an sen a ṭul dawn a, Malen-a'n medical a neih zawhah an tlangzarh ang.

Malen hi Liverpool nen pawh sawizawm a ni a, amaherawhchu English club hian Dutch forward hi lak an tum lo hrim hrim.

Dortmund hian Manchester United lakah Jadon Sancho an chan a, an striker rinrawl Erling Haaland hmalam hun a chiang lo. Norwegian striker hi Chelsea nen sawizawm a ni mek.

German club lakluh tur Malen hi kum 22 mi a ni a, Ajax leh Arsenal youth team aṭanga inzir chhuak niin a larchhuahna tak erawh PSV a ni thung. September 2019 aṭang khan Malen hian Netherlands tan a khel ṭan a, Euro 2020-ah pawh player pawimawh a ni pha.

Season liam ta khan Dutch forward hian PSV tan league match 32 a khelhah goal 19 a khung a, Europe club lian nena sawizawm a ni hi mak lo.