Erik Lamela leh Bryan Gil an inthleng

Tottenham Hotspur leh Sevllia ten an player Erik Lamela leh Bryan Gil te an inthleng dawn a, English club hian pound maktaduai 21 (€25m) an pe tel dawn.

Kum 29 mi Lamela hian nimin khan Spanish club-ah hian medical a nei a, Sevilla-in an tlangzarh thuai ang. Kum 20 mi Bryan Gil erawh Spain aiawha Olympic football a khelh mek avangin Japan-ah a la awm a, contract ziah fel theih a la ni lo.

Argentine midfielder Lamela hian pound maktaduai 25.8-in kum 2013 khan Roma aṭangin Tottenham hi a zawm a, Spurs tan hian season riat khel tawhin match 255-ah goal 37 a khung.

Season liam ta khan Lamela hian Arsenal lamah 'rabona kick' hmangin a pet goal a, Premier League Goal of the Season atan an thlang. Nomawi chawi kawngah erawh Lamela hi a vanduai hle.

Lamela hian Roma tana a khelh laiin Coppa Italia-ah final an lut a, an chak lo. Spurs a zawm hnuah pawh League Cup final vawi hnihah a vanduai ve ve a, Champions League final-ah Liverpool an hneh lo bawk. Argentina aiawhin Lamela hi vawi 25 a khel tawh a, Copa America 2015 leh 2016 khan final lutin an vanduai ve ve.