Remsiami telna India-in Germany an hneh lo
Tokyo Olympic 2020 neih laiah India hmeichhe hockey team chu Germany lakah 2-0 in an chak lo. Nimin tlai inkhelah world number 3 Germany tan hian Nike Lorenz leh Anne Schroder ten goal khat ve ve an khung.
Mizo nula Lalremsiami Hmar, captain Rani Rampal leh Vandana Katariya te hmangin India hian nawr let viau mah se an mamawh goal an sual chhuak thei lo. India hian Nilaini zing dar 6:30-ah champion lai Great Britain an hmachhawn leh dawn a ni.
An fimkhur
Germany hian an match hmasa zawkah champion lai Great Britain an hneh a, chak nawn ngei tumin India an hmachhawn. India pawh world number 1 Netherlands laka tlawm hlim an ni a, knockout stage lut turin point hmuh a pawimawh.
A tir aṭangin Germany lamin goal khung tumin thapui an thawh a, mahse India goalkeeper Savita Punia an paltlang thei mai lo. India coach Sjoerd Marijne-a'n Netherland an hmachhawn ṭum ang bawkin goal venhim hmasaktir a tum.
Quarter hmasa ber tawp dawnah Germany lamin a vawi khat nan penalty corner an hmu a, captain Nike Lorenz-i chuan mawi taka thai lutin, keeper Savita tan dan theih a ni lo. India erawhin chawlhlawk hmain goal hlauhawm an nei thei lo.
Penalty hlah
Second half tir lamah India-in penalty an hmu, a thai turin defender Gurjit Kaur a rawn pen chhuak - a ball thai hi Germany keeper Julia Sonntag chuan lo beng perin goal ban a per zui, a chung lama lut loin a pawn lamah a liam.
Germany lamin an vaw let chhunzawm, midfielder Anne Schroder chuan hnai tak aṭangin an goal hnihna a khung. India tan forward Vandana Katariya-i'n hun ṭha nei ve mah se goal zawnah a vaw thei lo. Railways player hian goal bar a tih per leh bawk.
Hun tawp dawn thlengin India lamin an bei let, mahse quarter hnuhnung ber khelh laiin India forward Sharmila Devi chuan yellow card a hmu a, minute nga chhung hrem a tawk a, goal khung tura beiseina a thamral nghal bawk a ni.
India hmabak
Group match bikah India hian khelh hmabak pathum an la nei - champion lai Great Britain bakah Ireland (world number 9) leh South Africa (16) te nen an la in hmachhawn leh dawn.
Ram paruk awm khawmten match hnih ṭheuh an khel tawh a, vawi hnih chak thei Netherlands chuan point ruk hmuin hma an hruai a, quarterfinal lut chiang tawha ngaih theih an ni - pahnihna Germany pawhin point ruk tho an neih tawh avangin an tlang ngei a rinawm.
India erawh an hmabak a hautak tawh dawn. India leh South Africa te chauh hi point la nei lo an ni - khelh hmabak pathum ṭheuh an la neih avang erawh chuan tumah an la tla lo, tlang turin beiseina an la nei vek.