Manchester United-in Varane an la dawn

Manchester United chuan Raphael Varane an la dawn a, English club leh Real Madrid te an inrem hnai. He thu i chhiar meuh chuan an inrem tawh hial ang.

Kum 28 mi Varane hian Real Madrid-ah kum khat chiah contract a nei tawh a, pawhsei a tum lo. English club leh French defender hi mimal contract-ah an inrem tawh thung. Spanish club hian Varane hi a chhuah an phal tawh a, a man tur atan an bituk hi euro maktaduai 50 bawr vel tura ngaih a ni a, Man United lamin hei aia tlawma lei theih an inbeisei.

Varane hi Real Madrid nen an inkar boruak a ṭha a, club hotute leh fan-te nena an inkar boruak ti chhe zawngin hma a la lo. Nimin thleng khan French defender hian training la nei mah se Man United jersey a ha thuai dawn.

French defender Varane hian ram tan match 79 a khel tawh a, FIFA World Cup-ah an ram a champion pui tawh bakah Real Madrid tan hian Champions League (4), La Liga (3), Copa del Rey (1), FIFA Club World Cup (4), UEFA Super Cup (3) leh Supercopa de Espana (3) te a chawi vek tawh.

English club hian khawvel defender man to ber Harry Maguire an kawl sa a, England international kawppui tur ṭha an zawng. Man United-in an captain Maguire aia record nei ṭha euro maktaduai 50 hnuai lama an lalut thei hi an vannei hle. Tun nipui transfer-ah United thawm a lian a, Borussia Dortmund aṭangin Jadon Sancho chu pound maktaduai 73-in an lalut tawh bawk.