Hamilton chung-changah Wolff a hmanhmawh lo
Mercedes team boss Toto Wolff chuan an driver Lewis Hamilton-a contract chungchangah season hman ṭan phawt a duh thu a sawi a, a thu sawi avang hian Hamilton leh Sebastian Vettel hma hun chuan sawi zui a hlawh thar leh nghal.
Britain tlangval Hamilton hian tun season tawp thleng bak Mercedes tan contract a nei tawh lo, media lam chuan a contract hi a pawtsei ngei dawn niin an ziak lang a, inremna erawh a taka ziah a la ni lo thung.
World champion vawi li ni tawh Vettel pawh tun season zawh rual hian Ferrari aṭangin a chhuak dawn, German tlangval hian khawi team ber nge a zawm dawn tih hriat a la ni lo - driver ropui pahnih hi an team inthleng thut thei dinhmun an ding; sawi chian theih erawh a la ni lo.
Wolff chuan, “Inkharkhip a nih avangin Lewis nen hian hmun hran daihah kan awm, hmai chhanna inbiakna la awm lo mah se thu erawh kan inhrilh tawn reng thung. Media lamin inremna siam tawh anga an sawi hi chu a takin a
la thleng lo.
“Intlansiak hi nei phawt ila, chumi hnuah chuan muangchangin contract chungchang pawh kan sawi thei zawk ang. Thil engkim hi pawn lam aṭanga a lan dana teh theih vek loh chen hi a awm,” a ti.
Mercedes team principal chuan Vettel chungchang sawi zuiin, “World champion vawi li ni tawh hi kan hnena a rawn kal duh a nih chuan, keini lamin kan duh lo che lo tih nghal ngawt chi a ni lo. Ngun takin kan ngaihtuah tur a ni ang,” a ti. Tun dinhmunah erawh an driver neih laiah an lungawi thu a sawi bawk.