I League khel dawn lo

All India Football Federation (AIFF) chuan thuchhuah siamin coronavirus vangin I League chu chawlh rih a nih tur thu an puang a, AIFF hnuaia football inelna kalpui zawng zawng chu March 15 aṭanga March 31 thleng chawl rih turin an ti phawt a ni. 

AIFF thu chhuak avang hian RG Stadium, Aizawlah pawh I League match kan hmu leh lawk dawn lo tihna a ni a, Indian football thuneitu sang hian March kartawpah thil thlen dan a zirchiang leh phawt ang a, thuchhuah thar an siam leh ang. 

Indian FA hnuaia Hero Second Division, Hero Youth Leagues, Golden Baby Leagues leh National Competition-te pawh chawlh vek an ni rih dawn a, AIFF chuan he thutlukna hi Ministry of Health & Family Welfare hnen aṭanga thurawn an dawn anga ti an nih thu an sawi. 

AIFF-in thuchhuah a siam hmaa I League match hnuhnung berah Inrinni khan Neroca leh Chennai City an inhmachhawn a, chak zawk awm loin 2-2 in an ṭin. Neroca-in minute khatna lekah Khanngam Horam hmangin hma hruai mah se Chennai club hian Mashoor Shereef (21') leh Adolfo Miranda (45+2') hmangin an chhang let a, chak turah an inngai. 

Mahse, hun pek belhah Neroca hian penalty hlawh chhuak lehin Philip Adjah chuan si phurh a rawn sut zo - Chennai goalkeeper Nauzet Santana chu hun pek belh minute kuanaah hnawhchhuah zui a ni.