Nipui bazarah Man United an che ṭha

Manchester United-in Jadon Sancho an lakluh hnuah defender ṭha Raphael Varane an lalut leh dawn a, nipui bazarah English club hi an che ṭha hle. Covid-19 vangin Man United hian player thar Varane hi karleh lamah chauh an tlangzarh ang.

Kum 28 mi Varane lalut tur hian Man United-in Los Blancos hi pound maktaduai 34 ($47m) an pe ang a, French defender man hi a chet ṭhat dan a zirin pound maktaduai 42 bawr velah a pung chho thei ang.

Real Madrid-in Varane-a club hlui Lens hnenah pound maktaduai khat an pe ve thung ang a, English club-in French defender an leina man zat a tlawm phah ang. Man United hian pound maktaduai 34 hi vawi khatah an pe tlak nghal vek dawn lo a, amaherawhchu an pek vek erawh a ṭul dawn.

Varane hian kum li chhung atan contract a ziak a, kum khat pawhsei theih dan awm bawkin Old Trafford-a kum 2026 thleng cham turin contract a ziak. French defender hlawh tur zat tak official-in tarlan ni lo mah se kar khatah £197,000 hlawh turin an sawi.

Tu nge Varane?
Raphael Varane hi April 25, 1993 khan Lille-ah a piang a, Lens aṭangin a inzir chhuak. Lens-ah hian Atletico Madrid midfielder Geoffrey Kondogbia leh Borussia Dortmund midfielder Thorgan Hazard te nen an khel ho.

Varane hian hma a sawn chak a, kum 18 mi lek a nihin euro maktaduai 10 bawr velin Real Madrid a zawm. Season lina aṭangin Spanish club lian tan hian hmun pawimawh a chang a, season10 a khelhsak chhungin sulhnu ṭha tak a hnutchhiah.

French defender hian Los Blancos hi Champions League (4), La Liga (3), Copa del Rey (1), FIFA Club World Cup (4), UEFA Super Cup (3) leh Supercopa de Espana (3) ah te a champion pui. Varane hi France-ah pawh tlarhnung innghahna a ni a, Les Bleus tan match 79 khel tawhin FIFA World Cup 2018 an champion ṭumin player pawimawh a ni.

An mamawh em?
Manchester United-in khawvel defender manto ber Harry Maguire an kawl a, England tlarhnung innghahna bakah hian Sweden leh Ivory Coast innghahna Victor Lindelof leh Eric Bailly te an kawl. Heng defender pathum bakah hian Axel Tuanzebe leh Phil Jones te an awm bawk.

Amaherawhchu Lindelof hi ball kangah a ṭhat tawk loh bakah tharum a ngah tawk lo a, Bailly hi inhliam vangin season tluan a daih lo. Man United academy chhuak Tuanzebe hi rinrawl hman ngam a ni lo a, Phil Jones phei chu season liam ta khan a inlan lo hrim hrim a, season hnih chhungin match riat chiah a khel.

Varane hi Maguire-a kawppui tur a ni dawn a, defence lai dinglamah a awm ang. French defender hian tawnhriat a nei ṭha a, game a chhiar thiam bawk avangin right back-a awm Aaron Wan Bissaka pawhin hma a sawn phah rin a ni.

Engtin zel?
Man United hian season liam ta kha chuan nipui bazar tawp ni thlengin an player duh ber Jadon Sancho lak tumin an hel a, an hlawhchham. Tun ṭumah erawh Sancho an la fel hma a, zanin dar 12:30-a Premier League kai thar Brentford nen bench aṭanga a inlan a rinawm hial.

Ole Gunnar Solskjaer-a hote hian Preston leh Everton nen friendly match an la khel dawn a, August 14-a Leeds United nen season an ṭan hunah chuan an ṭhat theih dan berin an khel thei dawn. Man United thuneituten nomawi duhin sum an theh chhuak a, tun season-a nomawi an chawi lo a nih chuan contract pawtsei hlim Norwegian manager tan a contract hman zawh hi a awlsam lo ang.