India mipa hockey team an chak

Nimin zing khan India mipa hockey team chuan Spain 3-0 in an hneh a, group match vawi thum khelh tawh chinah point ruk an hmuh avangin quarterfinal lut turin an dinhmun an sawhnghet ta hle.

India tan hian midfielder Simranjeet Singh chuan minute 14-naah goal hmahruai a khung. Defender, ram tana match 200 chuang khel tawh Rupinder Pal Singh-a'n goal hnih khung belh lehin nuamsa takin hnehna an chang.

World number 4 India hian an match hmasa berah New Zealand an hneh, a hnuah Australia ngam lo mah se Spain lakah an tho chhuak. Group A-ah pahnihna dinhmun an luah mek - Argentina leh Japan an la hmachhawn leh dawn a ni.

Group pakhatah ram paruk an awm khawm, an inkhelh kual vek hnuah a sang paliin quarterfinal an lut ang. Vawi thum chak tawh Australia chu an tlang chiang tawh a, hmun ruak pathum a la awm.