Hmahruaitu Porto an chak lo nghal

Hripui Covid-19 vanga hun rei tak an chawlh hnuah Portuguese Primeira Liga chu khelh chhunzawm a ni leh ta. Hmahruai mektu Porto chuan Nilaini zan khan an match hmasa ber khelin Famalicao lakah 2-1 in an chak lo.

Estadio Municipal de Famalicao-a inkhelah Porto keeper a chesual a, Agustin Marchesin hian a ball chan chu harsa lo taka pet chhuah a tumna lamah a pet sual. Box chhunga awm Famalicao midfielder Fabio Martins pe fuhin second half tir lamah goal hmasa ber a lut.

Porto lamin Jesus Corona hmangin minute 74-naah an siphurh sut mah se an hlim rei lo, minute 78-ah midfielder Pedro Goncalves chuan metre 25 vela hla aṭangin chakna goal a khung a, an mualah point thum hlu tak an hlawh chhuak.

Champion tum Porto an khel ṭha tawk lo, defender Pepe chu penalty chawi thei dinhmunah ding mah se pek a ni lo hlauh. An hnuaia awm Benfica aiin match khatin an khel tam ta a, an inthlauhna point khat chauh a nih avangin hmahruaitu nihna hloh thei an ni.

Porto leh Famalicao inkhel hi a hmuna entu an awm lo, mahse stadium pawn lamah mi 200 bawr vel an pungkhawm; fans pungkhawm hian hmai tuamna (mask) vuah deuh vek mah se an in awm hlat lem lo, bichilh takin an inhawrkhawm.

Inkhel dangah Portimonense chuan Lucas-a goal khat hmangin Gil Vicente chu 1-0 in an hneh. Portimonense coach Paulo Sergio chuan, “Stadium ruaka inkhelh chu a khawhar thlak ngei mai.

“Season thar inbuatsaihna ang mai a ni, boruak nuam nei leh tur chuan fans an awm a ngai. Stadium khata punkhawm an remti lo a nih pawhin 20% emaw 30% emaw tal chu fans an awm a ngai, mipui tel lo chuan football hi football a ni lo,” a ti.