Vondrousova hneh loin Osaka a tla

Japan khawpuiah ngei Olympic gold medal lak a tumna chu a tawp ta. Naomi Osaka chu Marketa Vondrousova hneh loin Tokyo Olympic 2020 hmeichhe tennis quarterfinal-ah a tla.

Nimin zing inkhelah Osaka hi rinkai zawk a ni, mahse a tir aṭangin world number 42 Vondrousova a khel ṭha zawk. 2019 French Open finalist hian darkar khat leh minute riat chhungin 6-1, 6-4 in hnehna a chang.

Quarterfinal pakhat zawk chu ni min chawhhnu lam khan khelh niin, Spain nula Paula Badosa chuan Argentine player Nadia Podoroska chu 6-2, 6-3 in a hneh. Badosa leh Osaka hnehtu Vondrousova te hi semifinal-ah an intawng dawn.

Kum 23 mi Osaka hi US Open leh Australian Open nomawi kawl mektu a ni a, hard court bika a match hnuhnung 25 zetah a chak thei - Olympic khelhna hi hard court a nih avang leh, anmahni ram a nih avangin champion tura rinkai a ni.

Amaherawhchu, world number 2 Osaka hi tun hnaiah a inkhel tam tawk lo. Rilru lam harsatna a neih avangin French Open leh Wimbledon aṭangin a inhnukdawk, match a khelh tam tawk loh hi a tuar niin a lang.

Grand Slam vawi li champion tawh Osaka chuan, "Tun hmain Olympic hi ka la khel ngai lo, thil re re chu a vawi khatnaah chuan a harsa ṭhin. Tun hma lama ka rilru ang kha chu ka la pu phak lo tih ka hria, ka thlen chinah erawh ka lawm.

"Inkhel loa awm rei chuan game ṭha tak khelh chhuah leh nghal a harsa ve bawk. Japan-ah ngei Olympic gold medal lak hi ka duhthusam ni ṭhin mah se tunah chuan a rem rih lo, ka pawm thiam a ngai," tiin a sawi.

Hnehna changtu Vond-rousova erawhin a khelh ṭhat ni a tawng. Czech Republic nula hian winners vawi 18 a vaw chhuak a, a khingpui service chhuhsak theihna remchang vawi 11 a neih zinga vawi nga chu a ti hlawhtling.

Tokyo Olympic hmeichhe tennis huangah world number 1 Ashleigh Barty chu hneh nei loin a tla nghal a, tunah seeded pahnihna Osaka a tlak leh tak avangin, seeded palina Ukraine nula Elina Svitolina chu player la dam zinga ranking sang ber a ni.