Dortmund kan ṭha tawk - Reus

Borussia Dortmund captain Marco Reus chuan Bayern Munich elpha tura an ṭhat tawk thu a sawi. Season liam ta khan Dortmund hi pahnihnaah an awm a, point 13-in Bavarians an pha lo.

Kum 32 mi Reus chuan, "German champion ni thei turin squad kan nei ṭha a, Cup chawi turin kan ṭha tawk a, Champions League-ah pawh stage sang zawk thleng thei tur kan ni. Chumi tur chuan mimal tin tun aia ngelnghet zawka kan khelh a ṭul ang," tiin a sawi.

Dortmund hi season tharah Marco Rose hnuaiah an khel dawn a, an khelh dan hmang an thlak dawn. Reus chuan, "Kan khingpuite kan nawr dawn a, defensive line pawh kan siam sang dawn. Marco Rose hi pa ṭha tak a ni a, tum nghet tak a nei. Zan khat thil thuah kan danglam dawn lo a, zawi muangin kan inthlak chho ang," tiin attacking football an khelh tur thu a sawi.