Atletico-a kir Torres a hlim

Spanish striker chawl ta Fernando Torres chuan Atletico Madrid-a a kir thei chu a hlim thu a sawi - Torres hian season thar aṭangin Atletico Under 19 coach hna a chelh dawn a ni.

Torres chuan, "Ka in ngeia ka lo kir leh thei ta hi ka inchhuangin nuam ka ti takzet a ni. Tunah chuan chona phurawm hmachhawn a hun leh ta a, kan hmangin Atleti tan theihtawp kan chhuah zel ang," a ti.

Atletico academy aṭanga inzir chhuak Torres hian 2001-07 inkar kha Atletico tan khelin captain hial a ni hman a, mahse, match 244-a goal 91-a khungsak hnuin kum 2007 khan Liverpool a pan san.

Liverpool-ah hian mimal anga a ropui lai ber chu a hmang angin a sawi theih a, match 142-ah goal 81 zet a khung hnuin January 2011 khan Chelsea a zawm.

Blues tan Champions League leh Europa League nomawi hial chawi mah se Atletico leh Liverpool angin a ropui leh tawh lo a, match 172 lai a khel chungin goal 45 chiah a khungsak.

December 2014 khan loan-in a hmangaih hmasa Atletico Madrid lamah a kir a, 2015-16 season tawp thleng loan-in a khel - July 2016-ah a nghetin contract a ziak a, season hnih dang khel zuiin match 160-ah goal 38-a khung a ni.

Torres hian a hun tawp lamah Japanese club Sagan Tosu panin season hnih a khel a, match 40 khela goal sarih a khung hnuin inkhelh a chawlhsan thu a puang - tunah chuan Atletico Under 19 coach a ni ta.