Spurs an indinthar zel: Tu nge an lak leh dawn?

Harry Kane leh Manchester City sawi zawm an nih reng karah Tottenham Hotspur an awm mai mai lo a, Sevilla winger Bryan Gil an lalut leh ta.

Kum 20 mi winger hian Spurs-ah kum nga chhung khel turin contract a ziak a, a man zat tarlan ni lo mah se pound maktaduai 21 nia ngaih a ni a, Erik Lamela chu a manah hian a kal tel bawk.

Spurs hian Atalanta first choice keeper Pierluigi Gollini chu season khat chhung atan loan-in an hawh tawh a, Spain tana vawi thum inlan tawh Gil an lakluh leh tak bawk avangin fans an hlim khawp ang.

London club hian coach thar Nuno Espírito Santo enkawlna hnuaiah bul ṭan thar an tum a, player thar beisei bakah chhuak tura ngaih an awm nual bawk.

Kane dinhmun
Khawvela striker langsar ber pawl ni siin Harry Kane-a'n nomawi chawi a la nei lo a, Tottenham Hotspur-ah chuan a beisei nomawi hi a chawi thei dawn lo niin a inhre ṭan - chhuah a duh thu a sawi tawh.

Mahse, tun dinhmuna 'serious' taka Spurs dawr awmchhun hi Manchester City chauh an niin a lang rih a, Pep Guardiola enkawl team hian pound maktaduai 100 huin an dawr tawh - club pahnihin he indawrna awm anga sawi hi an pha ve ve thung.

Thu thar berah chuan City hian pound maktaduai 160-in Spurs hi dawr an tum, tih a ni a, hei hi a thleng a nih chuan thilmak a tling ang. City hi sum hmang tam club anga hriat ni mah se player mal tak uchuak taka sum thehchhuah an nei ngai lo.

City-in player mal tana sum an sen hnem ber chu Ruben Dias an lakluh kha a ni a, Portuguese defender manah hian pound maktaduai 65 an theh chhuak.

Spurs lawmna
London club tana lawmna tur pakhat chu Fabio Paratici an nei ta hi a ni. Kum 49 mi football administrator hian tun season aṭangin Spurs managing director of football hna a chelh ṭan a, Italian club lian Juventus-a chief football officer lo ni tawh a nih avangin football khawvelah hmelhriat a nei ṭha hle.

Paratici hi football transfer khawvelah chuan rin hlawh ber pawl a ni a, hna a lo thawhpui tawhte chuan a hna atchilh lutuk chu a chanchina sawi tur an neih tam lai ber a ni.

Parma managing director of sport, Juventus-a Paratici nena thawkdun ṭhin Javier Ribalta chuan, "Engtinnge mutna hun hi a neih zawk ka hrethiam lo," tih hial khawpin Paratici hnathawh nasat thu hi a sawi.

Hetiang taka hnathawk nasa Paratici hian player an mamawh belh leh chhuak tura an duhte a thlithlai reng a, Italian football administrator lar hnuaiah Spurs thar hlak kan hmu a nih pawhin thil mak a ni lo ang.

Gil chu le!
Bryan Gil hi player langsar vut ni lo mah se kum 20 mi chauh a la ni a, heti zat lek kum ni chunga Spain tana vawi thum inlan thei a nih avangin a chhe lo tih a chiang bawk. Spurs-in an chang thei hi a vannei hle.

A man zat aṭang pawhin chhut ta ila, a manah Lamela a kal tel avangin pound maktaduai 30 chuang man a ni tihna a ni a, hmabak nei êng tak player a ni bawk.

Sevilla academy chhuak niin Spanish club tan hian inelna hrang hrangah match 21 a khel ve tawh a, season hmasa khan Eibar lamah loan-a kaltir a ni - league match 28 khelin goal li a khung a, assist vawi thum a nei.

Gil hi Olympic khelin Spain tan a feh chhuak mek a, Spurs squad a la zawm thei rih lo - Olympic-ah hian match hnih an khelh tawhah a inlan ve ve a, bench aṭanga luhtir ve ve a ni thung.

Magnificient 7
Kum 2013-a Gareth Bale-a'n pound maktaduai 85-a Real Madrid a zawm khan a hunlaia khawvel player man to ber a ni a, khatihlaia pound maktaduai 85 hlutna leh tun huna a hlutna chu inthlau tak a ni.

Spurs-in an player ṭha bik hralhna hmang hiam team thar din an tum a, Christian Eriksen, Roberto Soldado, Paulinho, Etienne Capoue, Vlad Chiriches, Nacer Chadli leh Lamela te an lalut a, 'Maginificient 7' tih hiala hming lem an pek player aṭangin Lamela hi chhuak hnuhnung ber a ni ta.

Lamela-a'n pound maktaduai 25.7-a Spurs a zawm khan a chungah beiseina sang tak a awm a, a hunlaia Spurs player man to ber a ni hial - mahse, London club-ah nomawi chawi nei miah loin Spain lamah a kir ta.

Kum 29 mi winger hian Spurs-a a cham chhungin match 257 khelin goal 37 a khung a, assist vawi 47 a nei bawk. Copa America (2), League Cup (2), Coppa Italia leh Champions League final-a khelhah a chak lo lama ṭang vek forward hian Spain-ah nomawi chawi a beisei ang.

Spurs hmabak
London club-in kut kuangkuaha season thar hmachhawn an tum lo a, transfer bazar-ah an mit an len nasa hle - Juventus midfielder Aaron Ramsey nen sawizawm mek an ni a, mahse, Arsenal tana lo khel tawh a nih avangin Ramsey hian Spurs a pan duh kher ang em, tih chu zawhna awm a ni.

Liverpool captain Jordan Henderson hming lam rik a ni a, mahse, English midfielder hian Anfield chhuahsan pawh ni se Champions League khelh a duh dawn avangin London club hi a zawm a rinawm chiah lo.

AC Milan midfielder Franck Yannick Kessié pawh Liverpool nen an inchuh mek nia sawi a ni a, mahse, Kessie hian tun hnaiah Milan-a a career hman zawh a duh thu a sawi avangin beisei san a harsa.

Sevilla centre back Jules Kounde hming pawh lam rik a ni a, Atalanta centre back Cristian Romero hi Spurs zawm ngei tura ngaih a ni thung - a man hi pound maktaduai 47 bawr ni tura ngaih a ni a, player ber hian London club zawm hi a hreh lo.

Alderweireld a chhuak
Spurs-in player an chhuahtir nual dawn bawk nia sawi a ni a, Lamela hma hian season hmasaa Villarreal lama loan-a lo chhuak tawh Juan Foyth chu Spanish club-ah hian a nghetin an kaltir tawh bawk.

London club hian an defender rinrawl ṭhin Toby Alderweireld chu nimin khan a chhuah thu an puang zui a, Belgian defender hian Qatari club Al-Duhail chu a zawm - a man zat hi pound maktaduai 13 bawr vel nia sawi a ni.

Spurs chuan, "Qatar club Al-Duhail nen Alderweireld transfer chungchangah inremna neih a ni," tiin thuchhuah an siam a, an defender chu a hma hun atan duhsakna an hlan thu an sawi bawk.

Alderweireld hi he thu buatsaih a nih lai hian a contract rei zawng tur tarlan a ni lem lo a, kum 32 mi defender hi a thiamna piahlamah hruaitu ṭha a nih avangin Spurs-in chhuahtir an phal hian mak tih a hlawh hle - Italy leh Spain aṭang pawhin duhtu a nei a, Qatar pan a thlang.

Mangṭha Alderweireld
Belgium tan vawi 113 inlana goal nga khungtu Alderweireld hian July 2015 khan Atletico Madrid aṭangin Spurs hi a zawm a, hemi hma season-ah hian Southampton-ah loan-a a khelh avangin English football-ah a mikhual lo.

Spurs tan season ruk a khelh chhungin match 243-ah a inlan a, goal kua a khung. 2015-16 season khan Spurs player of the year-ah thlan a ni a, Europa League squad of the season-ah a lang a, 2018-19 season khan Champions League final a luhpui.

Belgium tana World Cup (2014 & 2018) leh Euro (2016 & 2020) khel thei Alderweireld chuan, "White Hart Lane ka rawn lawi luh aṭang khan club chhungkua zingah min chhiar tel nghal a, engtiklai pawhin kan lam in ṭang ṭhin - stadium thar kan luh thlengin," tiin lawmthu a sawi a, a khelhpui ṭhin leh staff te hnenah lawmthu a sawi bawk.

Alderweireld a chhuak a, Spurs fans lung a leng ang tih a chiang - Kane dinhmun a la chiang bawk si lo! Spurs fans tana lawmna tur erawh Son Heung-min-a'n kum li dang cham tura contract thar a ziak kha a ni ngei ang a, Kane a chhuak a nih chuan South Korean tlangval hi London club-ah hian a 'hero' lehzual ang.