Khawih chet rual loh Djokovic

Mipa tennis thuneitu sang Asso-ciation of Tennis Professionals (ATP) chuan Thawhṭanni zan khan world ranking thar a ti chhuak a, a chung berah Novak Djokovic a awmchhunzawm zel.

Serbian star hian chawlh kar 331 chhung chu number 1 dinhmun hi a luah tawh, tun dinhmuna amah hnaih bertu Daniil Medvedev aiin point 2000 deuh thawin a sang fal, a che buai viau a nih ngawt loh chuan a chung bera awm chungin season a khar ang.

Tokyo lamah
World number 1 Djokovic hi Tokyo Olympic khelin Japan khawpuiah a awm mek. Third round-ah Djokovic hian Jan-Lennard Struff chu 6-4, 6-3 a hnehin quarterfinal a lut, hnehna chang turin darkar khat leh minute 17 chiah a hmang.

Grand Slam vawi 20 champion tawh hian a match lehpekah chuan Alejandro Davidovich Fokina a hmachhawn leh ang, Spanish tlangval hian inkhel dangah Australian player John Millman chu 6-4, 6-7(4), 6-3 in a hneh.

Djokovic chuan, "Inrintawkna ka nei sang hle, tun ṭuma ka khelh erawh mimal inelna a ni lo, ram tana feh chhuak ka ni. Serbia aiawhtu nih theih hi nuam ka ti a, ka inchhuang hle bawk," tiin ram aiawh nuam a tih thu a sawi.

Mipa tennis huangah 'Golden Slam' thei an la awm ngai lo. Season khat chhunga major title pali leh Olympic gold medal la kawp thei hmasa ber nih tumin Djokovic hian a bei mek - Tokyo Olympic leh US Open chauh a hmabak tawh.

Phuba lakna
Thla khat chauh a la liam hman a, grass court inelna lian Wimbledon-ah Stefanos Tsitsipas chu Frances Tiafoe lakah straight set hmangin a chak lo - rinkai ni chungin a mualpho hle. Tunah erawh Greek tlangval hi a che fuh zawkah a ṭang ve leh ta.

Nimin khan Tokyo Olympic second round-ah player pahnih hi an inhmachhawn leh a, darkar khat chuang deuh an inkhelh hnuin Tsitsipas hi 6-3, 6-4 in a chak. Quarterfinal-ah chuan Miomir Kecmanovic hnehtu Ugo Humbert a hmachhawn leh ang.

Inkhel dangah Diego Schwartzman chuan Tomas Machac chu 6-4, 7-5 in a hneh ve bawk, Argentine tlangval Schwartzman hian harsatna lian tham a la tawk lo a, a theihna a san bawk avangin medal dawn beisei ngam zinga mi a ni.

Olympic mipa tennis-ah hian champion lai Andy Murray chu a inhnukdawk tawh. Great Britain tlangval hi inlan tumin Tokyo-ah zin lut mah se hliam tenau vangin singles match a khel lo. Player ṭha Roger Federer leh Rafael Nadal te chu an inlan thei lo bawk.