Olympic Boxing : Lovlina Borgohain-i'n quarterfinal a lut

Nimin chawhma khan Indian boxer Lovlina Borgohain chuan German boxer Nadine Apetz chu split decision (3-2) in a hneh a, hmeichhe welterweight (69kg) category-ah quarterfinal a lut. Assamese boxer Borgohain hian quarterfinal-ah Chinese Taipei boxer Chen Nien-chin a hmachhawn ang.

Tokyo 2020-ah hian India aiawhin hmeichhe boxer pali an tel a, Mary Kom leh Lovlina ten vawi khat ve ve hnehna an chang tawh. Boxer dang pahnih Simranjit Kaur leh Pooja Rani te an la inlan lo thung. Mipa lamah panga telin Ashish Kumar, Manish Kaushik leh Vikas Krishan te match khatnaah an tla nghal vek a, Amit Panghal leh Satish Kumar te chiah an dam tawh a ni.

Lovlina a chak
Ryogoku Kokugikan arena-ah German boxer Nadine Apetz-i'n na takin Lovlina a nawr nghal a, Indian boxer a talbuai. Amaherawhchu Lovlina hian counter attack hmangin a nawr let a, round hmasa berah 3-2 in a chak zawk.

Second round-ah pawh boxer pahnihte an inhnehtawk a, judge te rilru hmin an tum. Lovlina-i'n a nawr na zawk a, left hook leh right uppercut hmangin a hnek fuh. Nadine pawhin jab hmangin a hnek let ve bawk. Judge mitah erawh Indian boxer a chungnung leh hret a, 3-2 a ni.

Round thumnaah kum 35 Nadine-i'n thapui a rawn chhuah a, Lovlina-i'n a footwook ṭhat hmang ṭangkaiin a khingpui hi a hlat thiam a, 3-2 bawkin hnehna a chang. World Championships leh Asian Championships-a bronze medal vawi hnih la tawh Lovlina hi split decision (28-39, 29-28, 30-27, 30-27, 27-30) in a chak hram.

Lovlina hian Chen Nien-chin a hmachhawn leh dawn a, Chinese Taipei boxer hian quarterfinal lut turin Angela Carini chu split decision (3-2) in a hneh. Kum 24 mi Chen Nien-chin hian 2018 World Championship-ah khan gold medal a la a, semifinal-ah Lovlina-i hi 4-0 in a hneh.

Pooja inlan hun
Vawiin chawhnu dar 2:33 hian Pooja Rani a inlan dawn a, middleweight (75kg) last 16-ah Ichrak Chaib a hmachhawn dawn. Algerian boxer Ichrak Chaib aiin Pooja hian record a nei ṭha zawk.

Kum 30 mi Pooja hian 2019 Asian Championships-ah gold medal a la a, hemi ṭuma a telna erawh light heavyweight a ni. Chutihrualin kumin khan Asian Championships inelnaah hian middleweight category-ah gold medal a dawng a, quarterfinal lut tura beisei a ni.