Clijsters tan a harsa rih ang - Ivanovic

World number 1 hlui Ana Ivanovic chuan Kim Clijsters inkhel leh thei ta chu a lawmpui thu a sawi a, chutih rualin tennis khelh leh hnuhnawh chu a awlsam loh tur thu a sawi bawk.

Belgian star Clijsters hian fa pathum a neih hnuah tennis a khel leh hnuhnawh, player ropui Serena Williams angin nu nih hnuah pawh hlawhtlinna chan theih a beisei. Coronavirus vanga an chawlh hma khan match hnih a khel a hman a, hnehna erawh a chang lo.

French Open 2008 champion Ivanovic chuan, “A inkhel kha ka lo en reng, ka beisei aiin a ball vuak a la dikin a taksa pawh a fit viau mai. Ṭha takin a rawn inkhel leh thei ang tih chu ka ring a, chutihrualin insiamrem tur erawh chuan hun a la mamawh deuh ang,” a ti.

Clijsters hian 2007 khan a vawi khat nan inkhelh a chawlhsan, thla 24 hnuah rawn kir lehin Grand Slam nomawi hial a rawn chawi leh thei - 2011 a inher chhuah chuan world ranking-ah pawh a chungnung berah a awm. Mahse, a hnu lawkah chawl lehin kuminah a vawi hnih nan a rawn kir.

World number 1 hlui Clijsters ang bawkin Ivanovic pawh kum 29 mi chauh la ni mah se 2019 khan tennis a chawlhsan a, tun dinhmunah chuan inkhel tura kir tumna a la nei rih lem lo.