Olympic Football : Group tin a la ngaihnawm vek

Olympic mipa football group match hnuhnung chu vawiin hian khelh a ni dawn. Ram 16 aṭangin Saudi Arabia chiah an la tla a, ram dang 15-in beisei tur an la nei vek. Tlai dar 1:30 aṭangin inkhel a awm ṭan dawn a, group khata mite hi a rual zelin an inkhel tawh ang.

Germany Vs Ivory Coast
Tlai dar 1:30-ah group D an inlan dawn. Champion lai Brazil-in Saitama-ah tla tawh Saudi Arabia an hmachhawn dawn a, harsatna hranpa nei loin quarterfinal an luh mai a rinawm. Miyagi Stadium, Rifu-ah Germany leh Ivory Coast an inkhel dawn a, hei erawh a hmuhnawm dawn.

Germany tan quarterfinal lut turin chak a ngai a, Ivory Coast tan draw a tawk thung. Stefan Kuntz-a kaihhruai Germany-in beisei an pha lo a, Saudi Arabia pawh an hneh hram. Kuntz chuan, "Lawmna lai awm chu kan theihna zawng zawngin kan khel a, tlawm mai kan tum lo," tiin a naute a fak.

Germany hian an match hmasa bera Brazil 4-2 a an hneh loh ṭumin captain Maximilian Arnold chu hnawhchhuah a ni a, Saudi Arabia lakah Amos Pieper-a'n red card a hmu leh bawk. Saudi an khelh ṭum hian forward Marco Richter a tlu a, Kuntz hian goalkeeper Svend Brodersen chu outfield player thlak tur hian a in warm up tir hial.

An khelh tawhna thlirin Germany tan Ivory Coast hneh hi a harsa dawn tih a chiang a, quarterfinal an luh theih nan kum 24 mi Nadiem Amiri a chet ṭhat a ṭul ang. African team hian Brazil lakah goal an venghim thei a, counter attack hmangin an hlauhawm thei bawk.

Elephants (Ivory Coast hming lem) hian red card hmuh vangin midfielder Eboue Kouassi an chhawr thei dawn lo. Chutihrualin Germany laka result ṭha nei turin Ivory Coast hi an la ṭha tawk. Kuntz-a hote an tlarhnung a phui lo a, hemi a nih avang hian Ivorian player Max Gradel, Amad Diallo leh Franck Kessié te chevel a hmuhnawm phah sawt ang.

Group B a ngaihnawm
Group B-a team pali South Korea, Honduras, New Zealand leh Romania ten point thum vek an hmu a, quarterfinal lut tur hriatthiam a la har hle. Tlai dar 2:00-ah Romania leh NewZealand an inkhel ang a, South Korea leh Honduras te an inhmachhawn bawk ang.

South Korea-in an match hnuhnung berah Romania 4-0 in an sawp a, goal difference an neih ṭhat avangin Asian team tan hian quarterfinal lut turin draw ringawt pawh a him. Amaherawhchu an khingpui Honduras hian chak an mamawh avangin South Korea tan hna a awlsam dawn lo.

New Zealand-in Premier League-a khel pha Chris Wood an kawl a, Burnley striker hian match hnihah goal hnih a khung tawh. All Whites hian quarterfinal luhna hun ṭha an nei a, knockout stage lut turin South Korea laka 4-0 ngawta chak lo Romania an hneh a ṭul dawn a ni.