Spain khingpui tur Argentina

Olympic football-ah vawiin tlai dar 4:30 hian Spain leh Argentina ten an inkhel dawn a, ram langsar pakhat zawk hi tla thei an ni. Group C inkhel dangah Australia leh Egypt te an inkhel dawn a, ram pali hian quarterfinal an la lut thei vek.

Euro 2020-ah Barcelona midfielder Pedri-a'n Spain tan minute zawng zawng deuh thaw a khel a, Olympic-ah pawh a la inlan kim vek. La Roja hian player langsar kawl ṭeuh mah se Olympic-ah beisei an pha lo a, Australia lakah Mikel Oyarzabal hmangin goal khat an khung hram tih loh chu goal an la khung lo.

Amaherawhchu Spain hian goal a la chhuah lo a, point li an hmuh tawh avangin Argentina laka point khat an hmuh chuan quarterfinal an lut dawn. La Roja khingpui pahnih Australia leh Egypt ten defensive game an khel ve ve a, hemi a nih avang hian Luis de la Fuente hote hi dem an harsa.

Argentina erawh quarterfinal lut turin point thum an mamawh a, attacking game an khelh a ṭul dawn a, La Roja tan hna a awlsam phah ang. Spain-ah hian Tottenham Hotspur player thar Bryan Gil a tel a, Sevilla aṭanga Spurs zawmtu player hi bench aṭangin ṭum hnih a lut tawh a ni.

Egypt leh Australia inkhel tur pawh hi an inhnehtawk dawn. Egypt hian Spain an chelh thei a, Argentina lakah goal khatin an vanduai. An captain Ahmed Hegazi hi West Brom tan pawha khel tawh a ni a, a tawnhriat hi a pawimawh ang.

Chutihrualin Pharaohs hote tana harsa tur erawh point thum hmuh ngei ngei a ngai dawn. Australia tan draw hi result himah a ngaih theih a, chutihrualin Graham Arnold hote hian chak ngei an tum dawn a ni.