Olympic Hmeichhe Football : Quarterfinal khel tur a hriat kim ta

Olympic hmeichhe football group stage chu nimin khan khelh zawh a ni a, a ṭha pariat zingah inelna thlengtu Japan an tel. Team pasarih dang hi Great Britain, Canada, Netherlands, Brazil, Sweden, United States leh Australia te an ni.

Japan an chak
Inelna thlengtu Japan-in quarterfinal thleng turin Chile 1-0 in an hneh a, goal awmchhun hi minute 11-naa Mina Tanaka-i'n a khung.

Inkhel dangah Canada leh Great Britain 1-1 in an inhnehtawk a, Great Britain hi pakhatna niin Canada hi pahnihnaah an awm. Japan hi pathumnaah awm mah se knockout stage an thleng ta tho.

A goal tam
Group F-ah Netherlands-in China 8-2 in an sawp a, Oranje hian tun inelnaah match thum aṭangin goal 21 ngawt an khung tawh. Inkhel dangah Brazil-in Zambia 1-0 in an hneh ve bawk.

Goal difference hmangin Netherlands-in group F-ah hma an hruai a, Brazil-in quarterfinal an lut bawk. Pathumnaa awm Zambia-in point khat chiah an hmuh avangin an tla.

US an chelh
United States-in Sweden an hneh loh hnuah insiamṭhain New Zealand 6-1 zetin sawp mah se group match tawp berah Australia nen goal awm loin an inhnehtawk.

US hi group E-ah pahnihna an ni a, Australia pawh pathumnaah awm mah se quarterfinal an lut ta tho. Sweden erawhin nimin tlai khan New Zealand 2-0 in an hneh a, Rio 2016 silver medalist hi group match thum khelhah an chak vek.

Engtin zel?
Quarterfinal-ah Netherlands leh United States an inhmachhawn dawn a, a hmuhnawm ang. Rio 2016-ah khan US hian Sweden hneh loin quarterfinal an tla a, tun ṭuma an khingpui tur Oranje hi group stage-a team hmuhnawm ber an ni.

Canada leh Brazil an inhma-chhawn dawn a, an intum tawk ang. Japan-in Sweden an hmachhawn dawn avangin semifinal thlen phak a har dawn a, Great Britain-in medal an duh a nih chuan Australia an paltlang a ṭul bawk ang.

Quarterfinal
July 30, Zirtawpni
Canada 1:30 PM Brazil
Great Britain 2:30 PM Australia
Sweden 3:30PM Japan
Netherlands 4:30 PM United States