Pro Volleyball a awm dawn lo

Tualchhung volleyball inelna lian ber Pro Volleyball League chu kuminah neih a ni dawn lo. Mizoram Volleyball Association chuan Covid-19 vangin inelna hi an neih theih loh tur thu an ti chiang a, nakkumah neih tum a ni ang.

Volleyball Federation of India-in season kal lai a la titawp lo a, hei vang hian an hnuaia inziak lut MVA pawhin season an la titawp lo. District, zone leh club zawng zawngte chu inkharkhip chhunga an kal dan pangngaia kal rih turin an ti.

PVL neih loh tur chuangchangah MVA secretary C. Lalrokhuma (Puitea) chuan, "Hripui leng hian khawvel infiamna a chiah buai hle a, kan state pawh kan bang thei bik lo. Hun rei tak aṭanga ruahmanna kan lo neih tawh Pro Volleyball chu kuminah kan nei thei dawn lo," tiin Vanglaini a hrilh.

Puitea chuan sawi zawmin, "Season kal lai hi dan pangngaiah chuan May thlaah a tawp ṭhin a, inelna neih laklawh dan a zirin June pawh kan kai ṭhin. Tun season atan Inter Branch YMA pawh khelh hmabak kan la nei, hei erawh MVA chauhin thutlukna siam theih a ni lo," a ti.

Coronavirus vanga buaina awm lo se la chuan Mizoram hi Mini National Games khel thei tur an ni, mahse hri leng vangin VFI chuan inelna hi an ṭhulh. Tun dinhmunah tournament khelh theih loh a nih bakah transfer pawh tih tawp lailawk a ni bawk.

Pro Volleyball hi ruahman dan hmasaah chuan April thla khan R. Dengṭhuama Hall, Mualpuiah khelh tur a ni. Amaherawhchu sorkarin state pawn aṭanga rawn hawte dah nan a hmang a, inelna hi tiam chin awm loa sawn lailawk a ni.

Hun rei tak chhung chu beiseina nen nghah a ni, mahse hri leng a reh loh bakah Mizo zingah kai thar an awm zel avangin tournament neih theih a nih loh tur thu hi tih chian leh hnuhnawh a ni - volleyball ngainatuten season thar an nghah a ngai dawn.

PVL-ah hian tualchhung team ṭha pruak an inel ṭhin a, league round-ah an inkhelh kual hnuin semifinal khelh a ni ṭhin. Season hmasa khan senior bakah junior inelna buatsaih a ni a. Senior huangah Chhinga Veng Spikers chuan Durtlang North hnehin an champion.