French Open khelh ngei kan tum - Giudicelli

French Tennis Federation (FTF) president Bernard Giudicelli chuan harsatna hrang hrang thleng thei karah pawh 2020 French Open khelh ngei an tum thu a sawi a, stadium chhungah fans an lut thei dawn em tih erawh an la sawi thei lo.

Tennis season calendar a tira an siam dan chuan Roland Garros hi May 24 aṭanga June 7 chhunga khelh tur a ni, a hmawr bawk a hnai tawh tihna a ni. Mahse coronavirus vangin infiamna khawvel a buai zo.

April thla khan FTF chuan Paris khawpuia inelna neih tur hi September 20 aṭanga khelh turin an sawn, tuna an chawlh lailawk hi July thla thleng daih a ni a, eng tianga rei nge an chawlh chhunzawm dawn tih hriat a la ni lo bawk.

World number 9 Gael Monfils nen an inkawmnaah Giudicelli chuan, "Chiang takin ka hrilh duh che, kuminah Roland Garros a awm ang. Kan duh leh beisei dan chuan a tam thei ang berin a hmunah en thei se tih a ni.

"Khawvel hriselna dinhmun kan thlir a, kan ram dinhmun kan ngaihtuah tel bawk. Sorkar lamin ruahmanna an siam thar zel a, tunah chuan kan kalphung tur hi tih chian nghal vek theih erawh a la ni lo," a ti.

January thla khan Australian Open an khel a, world number 1 Novak Djokovic a champion. Roger Federer inkhelh thiamna Wimbledon erawh hripui vangin an ṭhulh fel, world number 2 Rafael Nadal lalna hmun French Open chu khelh ngei an la tum.