Indian Super League champion ATK

ATK chu Indian champion an ni ta. Kolkata club hian a vawi thum nan Indian Super League nomawi an chawi a, Inrinni zan khan Chennaiyin FC chu final-ah 3-1 in an hneh. 

Jerry Lalrinzuala, Lallianzuala Chhangte leh Laldinliana Renthlei ten Chennaiyin tan bul an ṭan vek a, mahse Mizo pathum telna Chennai club vanneih zan a ni lo. Coronavirus vanga entu awm loa inkhelah hian ATK tan Javi Hernandez chuan goal hnih a khung a, Edu Garcia chuan goal khat a thawh ve bawk. 

Chennaiyin tan goal khung khawl Nerijus Valskis chuan goal khat a thawh ve a, mahse a team tan harhtharna thlentir turin a tawk zo lo. 

Jerry, Lianzuala leh Dinliana ten inkhel bul an ṭan avangin Chennaiyin chu Mizo mipui ṭan rawn an ni a, mahse Chennai club hian na taka an nawr nghal chungin minute 10-na lekah goal an chhuah!

Striker hlawh hnem Roy Krishna hnen aṭanga a ball hmuh chu Javier Hernandez chuan ṭha zetin a hlap lut a, Chennaiyin goalkeeper Vishal Kaith tan a team chhanhim turin tih theih a awm lo. Goal dang lut loin chawlhlawk hman a ni a, Chennaiyin hian na taka rawn nawr nghal tum mah se goal chhuahtuah zawk bawk an ṭang leh a, minute 48-naah Edu Garcia chuan a rawn khung. 

Chennaiyin tan Valskis chuan goal khungin beiseina thar rawn siam ve mah se an tho thei chuang lo - hun pek belh minute thumnaah Hernandez chuan an goal thumna a rawn khung leh a, 3-1 in an chak. 

ATK-in an chak avanga lawmthu hrilh tur an nei a nih chuan goalkeeper Arindam Bhattacharja chu fak tur a ni. Kum 30 mi goalkeeper tawnhriat nei ṭha hian a team a chhanhim ngun hle. 

Arindam hian vawi thum vel zet chu Valskis-a goal khung ngei tur nia ngaih a dansak a, Chennaiyin lamin inkhel an thunun zawk chunga ATK-in hnehna an chan theih nan player ṭangkai a ni. Indian player zingah ATK tana khel Michael Soosairaj chu player hmuhnawm a tling bawk a, kum 25 mi midfielder hian inkhel ṭantir lamah goal a khung teuh hle. 

Goal hnih khungtu, Real Madrid youth system chhuak Hernandez chu fak loh theih a ni lo a, final boruak rip tak hnuaia a class a pholan kha ATK chakna a ni. 

South Indian club hian inkhel ṭantir lamah goal khung nghal theihna remchang an nei a, mahse Nerijus Valskis-a shot ṭha tak chuan crossbar hnuai lam perin a goal lo! Hetihlai hian chak lo chunga Chennaiyin vanneihna hmuh hmaih theih a ni bik lo. Roy Krishna goal khung ngei tur nia lang chu Laldinliana Renthlei chuan goal line aṭangin a lo pet chhuak hman a, a hna a thawk ṭha takzet. Chawlhlawk hman nan minute nga a la awm tihah Roy Krishna hi hliam vanga lakchhuah a ngai bawk a, hei hi Chennaiyin tan chanchin lawmawm tawp a ni. 

Mahse, Fijian striker inhliam vangin ATK an talbuai phah duh lo a, goalkeeper Arindam hnathawh ṭhat vangin vannei zawk angin lang mahse chak phu zawk an ni. 

A tir lama kan chance neih kan khung lo kha kan tuar ta ni berin ka hria a, goal thun hmasa ngat ila chuan kan chak ka ring. Mahse, football-ah chuan chak reng theih a nih loh avangin a vanduaiah kan 

ṭang ta a ni. Kan chance neih ngaihtuah chuan chak kan phu zawkin ka hria. Mahse, goal an thun hma khan nasa takin inrintawkna a pe a, an chance neih chhun an hlah loh laiin keini goal lamah kan vanduai zan alo ni si a, a chak lo zawkah kan ṭang ta a ni. Kan bul ṭanna ngaihtuah chuan Pathian min hruaina hi ropui hlein ka hria,  season tir lama tuma rin kai lo kha final kan thleng thei hi a ropui takzet a ni. Champion chu duhthusam ni mahse kan tana ṭha tur zawkin Pathianin rem a ruatah ka ngai.

Mimal tak pawhin Pathian  min hruaina ropui ka ti a,  season pawh hmang ṭha viauin ka inhria. Lawmthu sawi mawlh mawlh tur ka niin ka hria. Champion chu duhthusam ni mahse a hun takah Pathianin min pek ka ring tlat a, tuna kan  lungngaihna leh ṭahna hi min ti chaktu leh thawhrim lehzual duhna min petu a nih ngei ka beisei. Season hmasa ngaihtuah chunga tun season ngun taka ka thlirin hmasawnna tam tak ka neiin ka hria. Amaherawhchu kawng tam takah hmasawn belhna tur ala awm tih ka hria a, tun aia season ṭha zawk hmang turin theihtawp ka chhuah ang. Min lo ṭawngṭaipui ṭhintu mimal, chhungkua leh kohhranah te an awm tih ka hria a, an chungah lawmthu ka sawi tak meuh meuh a ni. Pathian khawngaihna leh dikna chuan kan tana ṭha turin engkim a kaltir zel tih hi pawm zel phawt mai ang.- Lallianzuala Chhangte, Chennaiyin forward

Goal kan phur hma lutuk khan kan game a ti buai vekin ka hria a, mahse second half kha chu kan hneh zawkin ka hria. Chak phu zawkin hnehna an changah ka ngai a, a hma zawnga kan khelh ṭhin dan kan pha lo a ni. Ka thlen chinah ka lawm a, ka rin aia ṭhain season ka hmang a ni. Season lo awm leh tur atan ka inpuahchah lawk ang a, khawi team pawh pan ila, nomawi chawi ngei chunga season khar ka tum dawn a ni. 

- Jerry Lalrinzuala, Chennaiyin left back

Kan chance neih kan khung thei lo a, anni lamin an khung hma si kha kan tuar a ni. Chak phu zawkin hnehna an changah ka ngai a, ka thlen chinah vuina tur ka hre lo. Tun season pawh Pathian zarah ka hmang ṭha thawkhatin ka hria a, chawlh laiin theihtawp ka chhuah chhunzawm ang a, season thar atan ka inpuahchah ang. Kan khelh chhung zawnga min thlawpa, min ṭawngṭaipui ṭhintute chungah lawmthu ka sawi tak meuh meuh a ni. 

- Laldinliana Renthlei, Chennaiyin right back

Winning Pass of the League    Hugo Boumous, FC Goa

Golden Glove    Gurpreet Singh Sandhu, Bengaluru FC

Golden Boot    Nerijus Valskis, Chennaiyin FC 

Emerging Player of the League    Sumit Rathi, ATK FC

Hero of the League    Hugo Boumous, FC Goa

*Top Scorer Valskis hi Roy Krishna nen an goal khung (15 goals) leh assist (6) neih zat a in ang a, Valskis hian minute a khelh tlem zawk avangin Golden Boot a dawng. 

Final Result

ATK 3 - 1 Chennaiyin FC

ATK: Javier Hernandez 10', 90+3'; Edu Garcia 48'

CHE: Nerijus Valskis 69'

•    ATK hi a vawi thum nan ISL-ah an champion a, champion ngun ber an ni. 

•    ATK coach Antonio Habas hian 2014 khan ATK nen tho hian ISL nomawi a lo chawi tawh a, ISL-a vawi hnih champion thei coach hmasa ber a ni. 

•    ATK leh Mohun Bagan chu season tharah club pakhat angin a kal tawh dawn a, ISL leh I League-ah an champion ve ve!

•    Champion team hian sum faiin vaibelchhe 8 an dawng tel a, pahnihnain vaibelchhe 4 an dawng thung. 

•    Semifinal-a chak lo team pahnihin vaibelchhe 1.5 ve ve an dawng.