Zaninah inkhel ngaihven hlawh Real Madrid Vs Paris St-Germain

Champions League last 16-ah Real Madrid leh Paris Saint-Germain an inhmachhawn dawn tih hriat a nih rualin club pahnih inkhel tur hi khawvelin a ngaihven nghal. Sum ngah leh player lama 'an mit châk zawng' hlah lo team pahnih an intawng dawn.

Ticket 81,000 zawrhchhuah a nih khan minute 37 chhunga hralh zawh vek a ni–zanin dar 1:15-ah team pahnih an intawng dawn a, football khawvelin Santiago Bernabeu lam a hawi ang.

Ronaldo leh record
Real Madrid-in player langsar rual an kawl zinga ngaihven hlawh leh ber tur chu Cristiano Ronaldo a ni–kum 33 mi forward hian group stage match rukah goal kua a khung a, group match tina goal khung vek thei record a siam nghal.

Portuguese forward chuan, "Quarterfinal lut tur chuan match hnih ṭha taka kan khelh a ngai tih ka hria. PSG hi team ṭha tak an ni a, mah se kan inring tawk a ni," tiin French club hneh tura an ṭhat tawk thu a sawi.

Ronaldo hlau rawh u
PSG-in group stage-ah ringawt goal 25 khungin goal khung hnem ber an ni a, tlarhmaa Kylian Mbappe, Edinson Cavani leh Neymar neitu an nih avangin Real an hlau lo ang–Real boss Zinedine Zidane thuchah erawh, "Ronaldo hlau rawh u," tih a ni.

French manager chuan, "Ronaldo a khel chhia in ti a, Real Sociedad laka goal thum khungin a chhang tawh che u. Goal khung châkin a tui hal reng a, PSG hian an ven uluk a ṭul khawp ang," tiin a forward a chhuang hle.

PSG an inpeih
Bayern Munich awmna group-ah PSG hmahruaitu an ni a, hetichung hian last 16-ah Real an tawng dawn–French club hi 'vanduai' tia sawi theih an ni a, hetihrual hian Ligue 1 club coach Unai Emery erawh a zam lo.

Spanish manager hian Ligue 1-a an match hnuhnung bera Toulouse 1-0 a an hneh hnu lawkah, "Kan game duh ang tak kan khel tih ka hria a, Real nena kan inkhel tur nen erawh khaikhin chi a ni lo. Mahse, Bernabeu-a lenglut tur hian kan inpeih tawh a ni," tiin a sawi.