NM Gupta Trophy-ah Mizoram an champion nawn thei lo

32nd Capt NM Gupta Trophy final-ah Army Green chuan Mizoram 1-0 in an hneh a, Lalsangzuala Hmar hoten kum zawnin nomawi an chawi thei lo.

Satindra Mohan Dev Stadium, Silchar-ah Army Green defender Ayush-a'n goal awmchhun a khung a, champion team-ah hian Mizo tlangval pali PC Lallawmkima, Isaac VL Ruatkima, Lalramsanga Hauhnar leh PC Lalfakawma te an awm.

Mizoram striker Lalremruata chu best player-ah thlan a ni a, Tuikual North tlangval hian goal nga khungin Army Green forward Bikash Thapa nen joint top scorer an ni.

Tu nge khel?
Mizoramin goalkeeper Zothanmawia hmangin tlarhnungah Hmingthanmawia, Laldinpuia, Lalrinchhana Tochhawng leh Lalmalsawma te an tlar a, defence thuah nan hian Lalnuntluanga a awm bawk.

Midfield laiah Lalromawia leh MC Malsawmzuala te an awm a, tlarhmaah Lalremruata mal tlatin Tuikual North tlangval hi a sir aṭangin MS Dawngliana leh Lalrammawia ten an thlawp.

Army Green tan Samthang tlangval PC Lallawmkima leh Zemabawk North tlangval Lalramsanga Hauhnar ten inkhel bul a ṭan ve bawk.

Army tan goal 1
Ṭan phat aṭangin team pahnih an inhnehtawk a, Siaha tlangval MC-a'n a vawrh luh chu MS Dawngliana'n a la hman lo a, MC-a cross bawk chu Remruata'n goal zawnah a tauh thei lo.

Army Green-in goal an khung teuh zawk a, winger Nanish Singh-a cross chuan Mizoram keeper T. Mawia khumin goalline-a a lirh hnuah goal chhungah a kal lo. Hemi hnu hian midfielder Sushil Shah ball pet chu Mizoram ṭantute thin tiṭhawngtu a ni pha bawk.

First half tawp lamah Army Green goal nawr a na lehzual a, defender Ayush a freekick pet chu Mizoram keeper

T. Mawia'n a dan sak a. Amaherawhchu hemi aṭanga an corner hmuh chu Army Green defender palian Ayush-a'n goal hmahruai khung nan a hmang a, minute 38-na chiah a ni.

Army Green an khel ṭha chhunzawm a, halftime hmain chance vawi hnih dang nei leh mah se Mizoramin goal dang an khung belhtir tawh lo.

A goal lo
Mizoram coach Lalsangzuala Hmar-in goal duhin MC-a aiah Lalruatfela Zote a luhtir a, Army Green-in defensive game khel lo mah se hun khawhralna remchang an zawng ṭan nghal.

Samlukhai tlangval Lalromawia'n penalty area chhung aṭanga goal khung theihna hun ṭha a neih chu goal zawnah a pet thei lo. Hemi hnu hian right back Malsawma chu inhliam vangin lakchhuah a ngai a, Lalmuanawma'n a rawn thlak.

Mizoramin chance ṭha an insiam thei lo a, Army Green tlarhnung a phui ṭha hle. Minute 75-naah substitute C. Muana'n corner aṭanga a chance hmuh chu goal zawnah a pet thei lo. Coach Sanga'n goal nawr nat nan Ṭhasiama a luhtir a, Army Green-in goal khung belh tum tawh loin goal venhim hna tawp an thawk tawh.

Army Green coach Sujith-a game plan a hlawhtling a, tun inelnaa goal 15 khung thei Mizoram an dang bet a, 1-0 in hnehna an chang.

Inelna Thlirna Tawi
Mizoramin knockout stage-ah NF Railway (3-2), ARC (2-0). DGAR (6-0) leh Arunachal SS (3-0) te hmachhawnin an hneh vek a, semifinal-ah ASEB (1-0) hneh leh mah se final-ah Army Green an hneh lo.

Army Green-in champion turin Mizoram lakah phuba an la a, final thleng tur hian Bihar Regiment (2-0), Sikh Regiment (1-0), Cosmos, Bangladesh (9-0), ASEB (0-0) leh ARC (3-1) te an hneh bawk.