Goal khung thiam Liverpool inlan hun

Liverpool-in 2014-15 season hnua a vawi khat nan kuminah Champions League an khel a, 2008-09 season hnua last 16 an luh hmasak ber an tawng nghal bawk.

Jurgen Klopp-a hnuaia an ropuina neihlet leh tuma bei mek Reds hian zanin dar 1:15-ah Portuguese club ṭha FC Porto chu an rilru a quarterfinal dah chungin an lenchilh ang.

Goal khung thiam
Liverpool-in tun season-ah goal khung an harsat lo tih an pholang a, Champions League group stage-a an goal khung zat ringawt hi goal 23 a ni - PSG chiah an phak lo.

Reds-in Barcelona lakah Philippe Coutinho chan mah se Mohamed Salah, Roberto Firmino leh Sadio Mane an neih miau avangin goal khung an harsat phah lo - Firmino-a'n group stage-ah ringawt goal ruk khungin Cristiano Ronaldo (9) chiah a tluk lo.

Migs aiah Karius?
Reds goalkeeper buaina chu tun hnaia khel ṭha Loris Karius chet dan enin chinfel a ni dawn hnai niin a lang - Klopp-a'n season ṭantirah Simon Mignolet chu Premier League a khelhtir a, Karius-a'n Champions League a khel thung. German coach-in keeper a siksawi dan en chuan Mignolet-a goal ven hun a ni a, hetihlai hian tun hnaia a chet ṭhat vangin Karius hian Porto lakah goal a veng dawn niin khawthlang media te chuan an tarlang.

Awlsam lo?
Reds leh Porto vawi li an intawn tawhah Liverpool an chungnung zawk - vawi hnih hnehna changin vawi hnih an inhnehtawk. An intawn hnuhnung ber chu 2007 CL playoff-ah a ni a, inkhel pahnih belhkhawmah Reds hi 5-2 in an chak.

Zaninah erawh thawnthu hlui a ṭangkai dawn lo - Porto hian tun season-a an home match 90% ah hnehna an chang thei a, Vincent Aboubakar an nei bawk - Cameroon striker hian group stage match nga a khelhah goal nga khungin assist vawi hnih a nei a, Liverpool tlarhnung chhaih mangang turin theihna a nei sang tawk.