Aizawl FC-in risk an la Paulo Meneses - OUT; Santosh Kashyap - IN

Aizawl FC chuan I League match nga chiah a awm tawh tihin result ṭha an neih loh avangin Paulo Meneses an chhuahtir a, Portuguese manager thlak nan Santosh Kashyap an lalut nghal.

Nimin khan AFC-in Goa an pan a, AFC Pro Diploma License nei Kashyap hian Zirtawpni tlai dar 5:30-a India Arrows an hmachhawn hunah Mizo club hi a enkawl ṭan ang.

Paulo sulhnu
I League champion lai Aizawl FC-in tun season-ah nomawi an la chawi lo. Portuguese coach Paulo Meneses hian I Day Football group match hnuhnung ber aṭangin AFC hi enkawl ṭanin Ramhlun North hnehin bul ṭan mah se semifinal-ah Chanmari FC hneh loin an tla.

Aizawl FC hi MPL league round-ah match 14 aṭangin vawi sarih an chak a, vawi li inhnehtawkin vawi thum an chak lo a, pahnihna an ni. Semifinal double leg-a khelhah Mizoram Police nen vawi hnih an inhnehtawk hnuin penalty hmangin Aizawl FC hian hnehna an chang a, final-ah Chhinga Veng an hneh lo.

I League-ah AFC-in khualmualah East Bengal draw nghalin Churchill Brothers hneh chhunzawm mah se Shillong Lajong an hneh loh avangin match thum zawhah nomawi an humhim theih a rinawm lo nghal. Tunah hian match 13 khel tawhin vawi li an chak a, hetiang zat bawk hi chak loin an khingpui nen vawi nga an inhnehtawk avangin paruknaah an awm mek.

Aizawl FC hian I League-ah nomawi humhim theih an inbeisei tawh lo a, palina nih phak an tum tawh zawk. Heng inelna bakah hian Khalid Jamil-a hnuaia India ram champion an nih avangin AFC Champions League Playoff an khel a, Iran club Zob Ahan hneh loin an tling zo lo a, March 7 aṭangin AFC Cup group stage an khel ṭan ang.

Paulo hnuaiah AFC hian match 33 an khel a, vawi 12 chiah chakin a chak percentage hi 36.36% a ni a, an khingpui nen vawi 11 inhnehtawkin vawi 10 an chak lo. I League club hian tualchhung inelna bikah pawh Portuguese coach hnuaiah match 19 aṭangin vawi riat chiah an chak a, nomawi an chawi loh bawk avangin record bik thlir chuan sulhnu chhuan tur a nei lo.

Paulo a lawm lo
Portuguese coach Paulo Meneses chuan, "Player naupang zawk leh tawnhriat nei tlem ka enkawl a, result kan neih ṭhat tawk loh hnuah coach min mawhpuh a, result ṭha neih pui tur player min pe lo a ni. Chutihrualin Mizo player-te leh Mizoram football-in hma an sawn theih nan ka theihna zawng zawng ka pe a, hei hi min hriatthiam pui lo a ni," tiin club thuneitute thutlukna chuan a barakhaih thu a sawi.

A lungawi loh thu sawi chhunzawmin Meneses chuan, "Goal khungtu kan neih loh avangin striker kan mamawh thu ka thlen tawh a, Yugo Kobayashi bakah Kareem a inhliam avangin a thlak nan foreigner pahnih ka dil a, min phalsak mah se min tihhlawhtlinsak hmain min ban a ni. I League champion chu beisei ngam chi a ni tawh lo a, amaherawhchu palina hi chu ka la nih pui thei a ni," tiin Vanglaini a hrilh.

Japanese forward Yugo Kobayashi hian tun season-ah goal thum khung tawhin AFC tan I League-ah goal la khung tam ber mah se danglamna thlen thei a ni lo. AFC-in an winger pawimawh H. Lalmuankima an chan hnuah a thlakna tur an nei lo a, Portuguese coach hian an squad neih chhah tawk loh hi an result neih ṭhat loh chhanah a ngai.

Risk an la
Paulo Meneses rual hian a assistant coach Izan Martin Andres contract chu tihtawp sak a ni bawk. Aizawl FC-in head coach atan Santosh Kashyap an lakluh thu an tichiang tawh a, assistant coach tur erawh an la tichiang lo.

Aizawl FC manager Hmingthansanga chuan, "Football-ah chuan result a pawimawh a, result ṭha neih loh chuan mawhphurtu ber coach kan thlak a ṭul a ni. Mohun Bagan leh Neroca kan mikhual ṭum bakah Chennai City kan tlawh ṭum ten goal kan khung hmasa vek a, kan goal neih kan humhim lo a ni," tiin coach an ban chhan a sawifiah.

Hmingthana chuan sawi chhunzawmin, "I League-ah palina nih phak kan la inbeisei a, AFC Cup khelh tur kan la neih bawk avangin coach thlak mai hi kan tana ṭha turah kan ngai a ni. Player thar hi chu kan dap reng a, Paulo hi mi ṭha tak ni mah se player ṭha erawh a hre bik lo a, hei hi kan harsatna pakhat a ni," tiin Vanglaini a hrilh.

Aizawl FC-in Spanish manager Manuel Retamero an tihfuh tawk loh hnuah India ram football hrechiangtu leh Mumbai FC duh loh Khalid Jamil an lalut a, I League-ah an champion. Khalid-a'n East Bengal a zawm san hnuah AFC-in foreign coach la lehin a fuh tak loah chuan Mumbai FC relegate puitu leh duh loh Kashyap an lalut.

Kum 51 mi Kashyap hian Air India FC, Mohun Bagan, ONGC, Rangdajied United, Royal Wahingdoh, Salgaocar leh Mumbai FC te a enkawl tawh a, India ram football a hrechiang hle. Aizawl FC hian Kashyap-a chhawr turin Chidi Edeh an laksak dawn tih thawm a awm a, he thu i chhiar meuh chuan a chiang thei tawh bawk. Nigerian striker hi Mohun Bagan, East Bengal leh India ram club ṭhaa khel tawh a ni.