Vawiin aṭangin MFA Cup vawi 18-na

Mizoram Football Association Cup vawi 18-na chu vawiin ṭangin GSA Playground, Mamit-ah khelh ṭan a ni dawn. MFA buatsaih District FA hrang hrang club ṭhate inelna MFA Cup hi Mamit District FA-in a thleng dawn a, February 24-ah final khelh tur a ni.

Lawmman
MFA Cup-ah hian lawmmanah Rs 2,05,000 sem ral a ni ang a, team tel zawng zawngte hnenah Rs 5,000 ṭheuh pek an ni bawk ang.

Champion team-in MFA Cup bakah Rs 1,00,000 an dawng ang a, pahnihnain Rs 50,000 an dawng ang. Semifinalist team hnihin Rs 15,000 ve ve an dawng ang a, Fair Play award-in Rs 10,000 a keng tel bawk ang. Mimal lawmmanah best player leh top scorer te a awm ang a, trophy bakah Rs 5,000 an dawng ang.

Tute nge tel dawn?
District pariat-a club-te hi group hnihah ṭhen an ni a, an inkhelh kual hnua a sang pahnih ve vein semifinal an lut ang.

Group A-ah CDFA Academy, Champhai; Bazar Veng FC, Lunglei; Kawrtekhawveng FC, Mamit; United FC, Siaha te an awm ang a. Group B-ah Aizawl FC Junior, Aizawl; Project FC, Kolasib; Lawngtlai; New Serchhip FC, Serchhip te an awm thung.

Inelna chungchang
MFA Cup champion lai chu Champhai club Bethel FC an ni a, nikum khan Ṭhuamluaia Mualah Mizoram Police an hneh. Inelna hi kum 1999 aṭanga khelh ṭan a ni a, champion hmasa ber chu 1st Bn MAP an ni a, club inelna ngaihhlut ber zinga mi a ni.

Mizoram Premier League awm hnuah Chanmari FC chu champion hmasa ber an ni a, amaherawhchu MPL club-te an ṭhat fal deuh avangin MFA chuan inelna hi district club-te inelna atan a serh hrang. Hemi hnu hi chuan champion tura rinkai fal an awm tawh lo a, team an intluk tawk avangin inelna a nung sawt bawk.