Futsal thiam ber Dinthar
Lalmalsawma Memorial Futsal MFA Inter Village Futsal Tournament 2020 final chu Inrinni zan khan Malsawma's Yard, Leitanah khelh a ni a, Dintharin Zonuam 6-3 a hnehin an champion. Final-a hattrick siamtu Dinthar player Samuel Laltlanthanga chu best player-ah thlan a ni.
Champion team hian Rs 70,000 an dawng a, pahnihna Zonuamin Rs 40,000 dawngin semifinalist pahnih Chhinga Veng leh Republic Veng ten Rs 10,000 ve ve an dawng bawk. Last 16 aṭangin goal khung zat chhiar ṭan a ni a, Lallawmsanga leh Samuel-a ten goal 10 ve ve khung mah se match khel tlem zawk Zonuam player Lallawmsanga hnenah top scorer chawimawina an hlan.
Dinthar an thiam
Tun ṭum futsal inelnaah Zonuam-in fak an hlawh a, champion tura ringtu pawh an tam. Zonuam hian quarterfinal-ah Dinthar team pakhat zawk 'Team A' 5-3 in an hneh a, final-ah Dinthar B nen futsal hmuhnawm an lantir.
Lalchhuanawma (LCh-a) kaihhruai Dintharin bul an ṭan ṭha a, Ayush Dev Chhetri leh Samuel Laltlanthanga te hmangin goal an khung hma a, Zonuam tan an thiampuipa Lalṭhazuala'n (Puitea) beiseina a rawn siam.
Zonuamin an tlarhnung phui loh an tuar a, Samuel-a'n minute 13-naah Dinthar goal thumna a khung. Amaherawhchu, Zonuamin Dinthar lakah awlsam taka nomawi chan tum loin Puitea leh Varthanzama te hmangin an siphurh an sut zo. Hun chanve tling ṭep khelh tur a la awm tihin 3-3 a ni a, pressure sangah Dinthar an tlo. LCh-a hote tan Ayush, Lalawmpuia Sailo leh Samuel ten goal khat ṭheuh khung belhin hnehna an chang.
Team hnathawh
Dinthar champion puitu coach Lalchhuanawma chuan, "Kan team thawhhona ṭha hi uar takin ka sawi duh. Kan squad a chhah tawk lo a, player chhawr ngun bik ka nei a, ka fak duhte erawh khelhna hun chang ve mang lote an ni.
"Anmahni vanga tun hun thleng thei hi kan ni a, anni hian an khel meuh dawn lo tih hre chungin theihtawp an chhuah. Practice-naah an tlai ngai lo a, team boruak an ti ṭha hle," tiin Vanglaini a hrilh.
LCh-a chuan sawi chhunzawmin, "Dinthar hian Mizoram pum huap inelnaah nomawi kan chawina a rei ta hle. Chuvangin kan tan chuan futsal inelnaa kan champion hi a hlu takzet a, veng mipui ṭawiawmna ṭha tak kan neih avangin kan lawm bawk. Kan nomawi lak hi Dinthar tan a ni," tiin a sawi. Dinthar hian football club neiin MPL champion hmasa ber an ni a, kum 2014 khan I Day Football-ah an champion bawk. Amaherawhchu veng hlang anga an champion hnuhnung bera anga ngaih theih chu kum CYMA Football 2002-a Bethlehem Vengthlang hneha nomawi an chawi kha a ni a, nomawi an chawi hnuhnun berah hian tuna futsal team-a tel ṭhenkhat hi an la piang lo. Dinthar hian champion turin Chaltlang B (9-2), Khawhai (5-4), Durtlang B (5-3), Electric Veng A (7-4), Ramhlun South (6-5), Chhinga Veng (10-6 agg) leh Zonuam (6-3) te an hneh a ni.
Thlirna Tawi
Final
Dinthar 6 - 3 Zonuam
DIN : Ayush Dev Chhetri 6', 37';
Samuel Laltlanthanga 9', 13', 43';
Lalawmpuia Sailo 42'
ZON : Lalthazuala 12', 23'; Varthanzama 26'
Champion Dinthar Rs 70,000
Pahnihna Zonuam Rs 40,000
Semifinalist Chhinga Veng Rs 10,000
Republic Veng Rs 10,000
Top Scorer Lallawmsanga Zonuam
Best Player Samuel Laltlanthanga Dinthar