Zaninah MSL4 inkhel pawimawh Tuikual South Vs MSVT Hollow

Mizoram Super League Season linaah Tuikual South leh Mission Vengthlang Hollow BBSP ten chak an la nei lo a, zanin hian dar 7:30 hian team pahnih hi Hawla Indoor Stadium-ah an inhmachhawn dawn.

Tu nge tla dawn?
Tuikual South-in MSL champion an beisei ṭhin a, tun season-ah erawh Mission Veng Vikings leh Zarkawt BCA te an hneh tawh loh avangin semifinal thlir thei an ni rih lo.

Relegate lo turin TKS-in Mission Vengthlang an hneh a ṭul a, chutiang bawkin Hollow tan him turin Tuikual South hi an hneh ve a ṭul bawk.

MSVT hian match hmasa berah an tum tawk ber tura ngaih kai thar Republic VR4 an hneh lo nghal a, he inkhel a zawh hi chuan table mawngphah chhuahsan a harsa dawn tih hi hriat sa a ni.

Result aṭanga thlir chuan Hollow el tawk ber chu TKS an ni a, zanin hian Samuel Lalthlamuana kaihhruai MSVT hian chak dan kawng an zawn a ṭul dawn a ni.

Engtin zel?
Hollow-in rawlthar theihna nei sang tak tak an kawl a, amaherawhchu MSL-ah an theihna an lantir ngam tlat loh avangin anmahni ang bawka beisei pha lo Khatla TBL lakah pawh 114-51 zetin an tlawm a, hei hi tun season-a insawpna nasa ber a ni.

Hetihlai hian Ronald Zomuanpuia erawh mimal ang chuan khel ṭha ber zinga mi a ni a, VR4 (24) leh TBL (26) an hmachhawn ṭuma a point hmuh belhkhawm chu point 50 a ni. Zanin hian Ronald-a a ṭangkai dawn a, chu aia pawimawh zawk erawh coach El-a game plan a ni ang.

Tuikual South-in Vanchuangpuia awm lo an tuar tih phat rual ni lo mah se chhuanlam siam thei an ni tawh lo, F. Zodinthara hoin an thawhchhuah a ṭul tawh. Lalnunpuia Renthlei-in a club hlui a hmachhawn dawn a, TKS jersey number 2 ha R-a hi Hollow BBSP mangchhia thlen thei tur a ni.