East Bengal beiseina a nung thar

Season hmasa I League-a Aizawl FC an champion ṭumin match tawp ber thlengin Khalid Jamil-a'n champion lam hawi thu a sawi duh lo a, nimina Minerva Punjab nen an inhmachhawn hma erawhin, "100%-in kan la champion thei tih ka hria," a ti a, a nauten an pu thusawi dikna khelmualah an lantir.

East Bengal hian nimin khan an mikhualna ramah Minerva Punjab chu Cavin Lobo goal ropui hmangin 1-0 in an hneh a, I League nomawi beiseina a nung thar leh ta - khelh zat in anga club pahnih inthlauhna chu point thum chauh a ni tawh.

Al Amna a lo kir
Hliam vanga a chawlh reng hnuah East Bengal tan Mahmoud Al Amna-a'n Minerva Punjab a hmachhawn a, Syria international hlui hian Kolkata club tana a lo kir lehna inkhelah player ṭangkai a nihzia a pholang lehnghal - hero of the match-ah thlan a ni.

East Bengal-in minute 33-naah chance duhawm an nei a, Al Amna through ball duhawm a dawn hnuah Dudu Omagbemi chuan Yami Longvah tan ball duhthusam a pe, mah se hnai tak aṭangin Longvah hian goal-ah a chantir thei lo.

Chawlhlawk hman a nih hnuah East Bengal tan Laldanmawia Ralte chuan hun ṭha a nei a, mah se Sialhawk Express shot hian Minerva defender Eric Dano kut a per - penalty tur ni mah se referee-in spot a kawk tlat lo.

Lobo a ngai reng
Kum 29 mi Cavin Lobo-a'n Indian football-ah a long range shot a hmingthanpui a, Goan attacking midfielder hian a thiam a la theihnghilh lo tih Minerva lakah a pholang - Al Amna back heel aṭanga a ball hmuh chu penalty box pawn aṭangin goal kilah a pet lut a, Minerva keeper a dem theih loh.

Minerva-in an si phurh sut tumin Reds and Golds nawr let mah se an chhuanvawr Chencho Gyeltshen leh midfielder William Opoku ten an hun ṭha neih an chhawr thei lo a, Punjab club-in an elpui lakah point an hmuh loh avangin I League nomawi inchuh boruak a nung thar.

East Bengal tan Laldan­mawia Ralte bakah Lalram­chullova chuan inkhel bul a ṭan bawk a, Brandon VL Remdika erawhin bench lamah hun a hmang tluan thung.