Vawiinah Federer inlan dawn

Australian Open nomawi a chawi hnua a match hmasa ber atan Roger Federer chuan vawiin chawhnu dar 2:30 hian Ruben Bemelmans a hmachhawn dawn, Swiss star hian Rotterdam Open semifinal a thleng thei a nih chuan world number 1 a ni dawn a ni.

Tun dinhmunah Ra­fael Nadal chuan Asso­ciation of Tennis Pro­fessionals (ATP) world singles ranking-ah point 9,760 hmuin hma hruaitu a ni mek a, a hnuai chiaha awm Federer nen an inkarah point 155 chiah a awm. Spain tlangval Nadal hi hliam vangin a chawl mek.

Kum 36 mi Federer hian tun hmain number 1 dinhmun a chelh reng tawh ṭhin a, a chung berah a lawn kai leh thei a nih chuan world number 1 upa ber a ni thei dawn a ni.

Grand Slam vawi 20 champion tawh Federer chuan, "Hrisel ṭha taka ka inkhel thei hi ka lawm hle, hnehna chan chakin ka la tuihal reng a, tuna kan inelna hi rin aiin a awlsam dawn lo hle. Theihtawp chhuahin ka bei dawn a ni," tiin a sawi.

Ranking chungchang sawi zuiin, "World number 1 nih chu ka chak hle, tunkar chhung ngei hian nih hman pawh ka duh. Hnehna ka chang a nih chuan Stan Wawrinka nen kan inhmachhawn thei dawn tih ka hria a, ani khelh hi chu engtik lai mahin a awlsam ngai lo," tiin a sawi.

Seeded pakhatna Federer hian hnehna a chang thei a nih chuan Grand Slam vawi thum champion tawh Stan Wawrinka a hmachhawn a ngai dawn.