Chelsea leh Conte thlamuantu Hazard

Premier League champion lai Chelsea chuan Eden Hazard goal hnih hmangin West Brom chu 3-0 in an hneh a, result ṭha an neih loh rei avanga boruak rit tak hnuaia awm manager Antonio Conte tan thawk huaina tham a tling ngei ang.

Bournemouth leh Watford an hneh loh avangin Blues manager Conte chu ban theih dinhmunah a ding nia sawi a ni. League match bikah nikum December thla hnua a vawi khat nan an khelmualah hnehna an chang ve leh chiah a, table-ah palina an ni leh ta.

Mi bik Hazard
Thawhṭanni zanah Arsenal aṭanga an lakluh Olivier Giroud-a'n inkhel bul a ṭan a, France international hian Hazard goal hmasa a siamsak. Box chhungah Giroud-a'n a tharum hmang

ṭangkaiin hmunawl a sual chhuak a, minute 25-naah Hazard tan goal khung turin hna harsa a awm tawh lo.

Second half-ah midfielder Cesc Fabregas ball khen per dawngtu wing back Victor Moses chuan an goal hnihna a khung a, dinhmun hima an din hnuah Belgium international Hazard-a'n box chhungah ball lalutin West Brom defender pahnih kar aṭangin an goal thumna a hlap lut.

Kum 27 mi Hazard hian West Brom lakah league goal sarih a khung ta a, Blues tana goal a khung bakah an goal nawrna thapui pawimawh a ni tluan chhuak zak. Gunners striker hlui Giroud nen an inkawprem hle dawn niin a lang nghal a, goal tam zawk khung thei turin hun remchang an insiamsak thei a ni.

Conte a lawm
Stamford Bridge-a inkhel entu ten Conte an thlawp zia lantir nan a tir aṭangin Italian manager hming hi an lam rual dual dual. Juventus manager hlui hian kum 2019 thleng contract a nei mek a, hman zawh a duh thu a sawi tawh.

Blues manager Conte chuan, "Ka chunga thuthang leh boruak leng vel hre reng chunga min thlawp tlattu fans chungah ka lawm takzet. Season a tawp hma chuan boruak harsa kan tawng dawn tih ka hria, player ni loin keimah ngeiin he buaina hi hmachhawn ka duh," tiin a sawi.

Conte hian season hmasa khan league nomawi a chawi a, tun season-ah erawh Manches­ter City lakah an chan dawn niin a lang tawh. London club hian FA Cup leh Champions League-ah beisei an la nei a, heng inelna pahniha an result hian an manager dinhmun pawh a hril thui thei hle tura ngaih a ni.

Sturridge a hliam
Premier League mawng­phah luahtu West Brom-in tun season chhunga vawi 13 an chak lohna an tawng a, Blues an hmachhawn ṭum hian minute thumna lekah Daniel Sturridge chu malpui hliam vanag lakchhuah a ngai nghal.

England international Stur­ridge hian 2013 January khan Chelsea aṭangin Liverpool a zawm a, hliam vangin khel­mual­ah a inlan tam thei lo - Anfield a pan hnuah vawi 31 zet hliam a nei tawh a, January trasfer lai khan Reds aṭangin West Brom hi loan hmangin a zawm.

Baggies manager Alan Pardew chuan, "A tir lama Daniel Sturridge hliam nghal kha kan tan chuan channa nasa tak a ni a, chawlhkar hnih vel a chawlh hnuah a rawn kir leh theih kan beisei," tiin a sawi.

English manager chuan beisei an la neih thu sawi zuiin, "Match ṭhenkhatah chuan point kan hmuh theihna tur hun ṭha an bawhpelh fo a, an khelh hma­bakah hnehna kan chan chhoh theih chuan kan chunga awmte kan la chhaih buai thei ang," a ti a, a beiseina a la tawp lo.