Sipai training kha a hautak - Son

Tottenham forward Son Heung-min chuan an ram South Korea-a sipai training a zawm chungchang a sawi chhuak a, thil hautak leh taksa hrisel neih ngai tak a nih thu a sawi lang.

South Korea danah chuan an rama mipa te chuan sipai training an zawm ngei ngei a ngai, infiamna lama hlawhtlinna nei sang bikte erawh ngaihhnathiam theih an ni - training an neih hun chhung pawh a rei lo bik.

Kum 27 mi Son hi coronavirus leng vangin April thla khan an ramah hian a haw a, sipai training a zawm nghal bawk. Asian Championship-ah an ram hi hlawhtlinna a lo chanpui tawh avangin a sipai ṭan hun hi tih tawisak a ni.

Son chuan, "Chawlhkar thum hautak tak a ni, awmawlna hun a awm lo. Rim takin training kan nei a, a hautak takzet, chutih rualin tawnhriat ṭha tak chu a ni. Ka thil tih zawng zawng kha ka sawi vek thei lo, hun harsa karah khan nuam leh hlim awm, hriatreng tur erawh a tam.

"A ni hmasa ber chu inhmelhriatna hun a nih avangin a boruak a danglam deuh, a hnu lamah erawh room pakhatah mi 10 zel kan awm a, inpawh leh inhrethiam tlang takin thil kan ti khawm," a ti. Son hi a training puite zinga ti ṭha ber atan an thlang.

February thla laihawl khan Son hi a ban a hliam a, hri leng vanga Premier League an chawlh lailawk hma khan a inlan thei lo tawh. Tunah chuan a hliam hi a dam tawh a, London khawpuiah Spurs tan ṭha takin training a zawm leh tawh - manager Jose Mourinho tan chanchin ṭha a ni.