Team huaisen Spurs an tlawm lo

Tottenham Hotspur-in Juventus lakah minute kaw chhung lekin goal hnih chhuuah mah se huaisen takin an bei let a, minute 90 a zawh meuh chuan 2-2 in an ṭin.

Juve khelmuala inkhelah Gonzalo Higuain-a'n hma takah goal hnih a khung a, Harry Kane hmanga Spurs-in an si phurh an sut ṭhen hnuah Turin club-in London club beng daihna remchang nei mah se Higuain-a'n penalty a pet goal lo zui.

Tawnhriat ngah zawk Juventus-in goal venhim hna thawk mah se beidawng duh lo Spurs-in an si phurh sut zoin an thawhrim rah an seng a, Wembley-ah lungmuang zawkin Juve hi an mikhual thei tawh ang.

Juve nge nge
Turin khawpuia inkhelah Juventus-in goal khung turin minute hnih bak hun an mamawh lo–Miralem Pjanic-a chip freekick ṭha zetin Spurs tlarhnung a bum hnuah Higuain-a'n a chang a, Argentine striker hian tawih zetin a pet lut.

Spurs an insiamṭha hman lo. Goal an chhuah aṭanga minute sarih hnu lawkah Ben Davies chu Federico Bernardeschi lakah a foul a, penalty a chawi – a pet turin Higuain a lo pen chhuak a, khung turin harsatna a tawk lo.

Goal hnih an chhuah hnuah London club an harh a, Kane-a'n hun ṭha a nei nghal - mah se English striker-in pen ruk vel lek aṭanga hnaia a ball tauh chu Gianluigi Buffon la tar loh zia pholanna chauh a ni.

Spurs = Kane?
Kane-a'n a hun ṭha neih hmasak goal-a a chantir loh hnuah Buffon-a'n English striker hi a dang nawn reng tawh lo–Dele Alli-a ball siamsak chu Kane hian Buffon tlan helin goal-ah a chantir.

Alli-a'n Kane tana a siamsak hnuah goal khungna remchang nei ve mah se hnai tak aṭangin a tauh over a, Christian Eriksen-a hun ṭha neih chu Buffon-a'n ṭha zetin a dan sak bawk.

Chawlhlawk hman a nih hmain Juve-in a vawi hnih nan penalty an hmu a, Spurs phur lutuk tur beng daihna remchang a ni – mah se, Higuain-a'n he hun ṭha hi bar pet per nan a hmang a, London club an phur sawt.

Buaipui tham Eriksen
Juventus-in chawlhlawk hman a nih hnuah Bernardeschi hmangin chance ṭha zet an neih chhunzawm a, mah se Spurs keeper Hugo Lloris fakna mai a ni. English club-in an nawr chhunzawm a, Serie A club-in an goal venhim an thlang thung.

Minute 71-na a ni a, Juve an ṭang zo tawh lo – Christian Eriksen chuan 'Spurs hi Kane-ah chauh an innghat lo' tih pholan nan freekick hmangin si phurh a sut a, Buffon tan dan theih a ni lo.

Goal dang lut loin inkhel a tawp a, hma taka goal hnih chhuahtu Spurs chu team lawm zawk an ni–December 16 hnuah Spurs-in tlawm hmel an hmu tawh lo a, league leh cup game-a hetichhung tlawm lo tur hian match 13 an khel.

Poch a hlim
Spurs manager Mauricio Pochettino chuan, "Kan khelh dan a puitling zawk a, ka naute hian hma an sawn zel a ni. Goal hnih chhuah hnua huaisen taka kan beih let avangin kan khel ṭha a, a bik takin second half-ah khan kan khel ṭha lehzual," a ti.

Argentine coach chuan, "Draw result ai mah chuan hnehna chan hial pawh kan phu-ah kei chuan ka ngai. Ka player-te khelh dan kha kan hriat sak a ngai a, lawmpui an phu a ni"

"Quarterfinal erawh kan la lut thei. Beiseina sang tak kan nei a, Wembley an lo zin hunah Juve hi hneh theih kan inring a ni," a ti – Real Madrid leh Borussia Dortmund awmna aṭanga hmahruaitu an nih avangin Poch-a beiseina hi thil awm lo a ni lo.

Beidawng lo Allegri
Higuain-a'n Champions League-a Juventus player goal hnih khung rang ber dinhmun luah mah se a team a chakpui zo lo a, Juve-in 2018-ah a vawi khat nan goal an chhuah ta bawk.

Beisei ang result-in Italian champion duhsak lo mah se coach Massimiliano Allegri erawh a beidawng lo. Juventus boss chuan, "Kan intawn hma khan quarterfinal lut turin 50% chance kan nei a, engmah a la inthlak danglam lo"

"Champions League-a Spurs hmachhawn kan nih avangin a harsa dawn tih kan hre sa a, team ṭha tak an ni. Tunah chuan London lam kan hawi a hun tawh. Final ang maiin kan khel ang a, quarterfinal lut ngei turin kan bei ang," a ti a, Wembley-ah chak a inbeisei.