Chanmariin final an thleng? An khingpui tur Chhinga Veng emaw Saron Veng

RFL Plastics MFA Futsal League semifinal first leg chu February 13 zan khan R. Dengṭhuama Multipurpose Hall, Mualpuiah khelh a ni a. Chanmariin goal riat an khung a, minute 50 khelh tur la awm mah se goal khung ve lo Durtlang tan thawhchhuah a har tawh ang.

Inkhel dangah Chhinga Vengin Saron Veng 3-2 in an hneh a, February 16, Zirtawpni zanah second leg khelh a ni dawn a, inkhel hmabak minute 50 a hmuhnawm khawp ang.

Avid-a Show
Semifinal-ah Chanmari an kim a, Durtlang erawh hliam leh damlohna vangin an kim lo. Harsatna belhchhah turin Durtlangin chhun lamah NECS Cup an khel a, an chau tih hai rual a ni lo.

Chanmari ṭan phatah Lalbiaknia hmangin goal an khung nghal a, tawnhriat nei Reuben Zosangpuia'n fing takin khelmual chhungah ro a rel a, tlarhma lamah David Laltansanga chu danglamna a ni. Chawnpui tlangval Avid-a hian first leg-ah hian goal hnih a khung bakah a ṭhiante khung tur a siam sak a, tun inelnaah goal 13 a khung tawh bawk.

Hun tawp lamah Durtlangin tha chhuah tur an nei tawh lo a, Chanmari lamin zahngaihna lantir duh loin hun a tawp meuh chuan goal riat an khung a, final khel turin an inpuahchah thei tawh ang.

Lawm a kim lo
Saron Vengin league round-a an hneh tawh loh Chhinga Veng an hlau bik lo a, K. Lalrinawma hmangin goal an khung hmasa bawk.

Amaherawhchu Chhinga Veng player-ten football-a an tawnhriat neih ṭhatna futsal-ah an chhawr a, an talbuai duh lo. Lalrinhlua leh Ronald Lalzikpuia te hmangin an chhanglet nghal a, 2-1 in first half a tawp.

Second half-ah C. Beithatlo hmangin Chhinga Vengin goal thumna an khung a, Saron Veng beiseina siam turin R. Lalchhantluanga'n a pet goal. Player hmuhnawm Lalsawmzela'n hun tawp hma hretin goal-ah a pet a, goal-ah ngaih ni zet mah se referee-in thutlukna sut lehin goal-ah pawm a ni lo.

Chhinga Vengin goal li khungah an inngai a, record-ah erawh goal thum an khung. Hei vang hian an lawm a kim lo a, Saron Veng tan erawh thu lawmawm niin final lut turin beisei tur a la awm.