Zarkawt BCA-in MSL4 semifinal an thleng : Zaninah Khatla TBL leh Republic VR4

Mizoram Super League Sea­son linaah Zarkawt BCA-in Thawhlehni zan khan Republic VR4 chu 100-68 in an hneh a, champion lai Mission Veng Vikings hnung zuiin semifinal an lut.

Zanin dar 7:30 hian MSL kai­thar Republic VR4 leh Khatla TBL te Hawla Indoor Stadium-ah an inkhel dawn a, club pahnih hi match thum an khelh tawh aṭang­in vawi khat chiah an la chak.

Zarkawt an vul
Zarkawt BCA hi quarter tin­ah Republic VR4 lakah an chungnung a, Khatla TBL-in Mission Vengthlang Hollow an sawp hnua point 100 score tling leh hmasa ber an ni.

BCA tan ṭum dang ang thoin Zonunsanga (18 pts), Lalrina Renthlei, Dennis Lalmuanpuia (15) leh Matthew Sailo (11) te an khel ṭha a, Chawnpui tlangval Jackson Lalrintluanga leh Zarkawt tlangval Lalsangkima ten point 10 ve ve an belh bawk.

Zarkawt BCA-in season liam ta ang thoin league round an khel ṭha a, semifinal chiang takin lut mah se hmabak an la nei - pakhatna an nih loh chuan final kalkawng a la harsa dawn. Hei vang hian February 21 zana MSV Vikings nena an inkhel tur hi hmahruaitu inchuhna a nih dawn avangin a pawimawh ang.

Khatla TBL hi...
Khatla TBL-in Zarkawt BCA leh Mission Veng lakah chak zo lo mah se an ngam zawng MSVT Hollow lakah point 114 zet an khung theih avangin kai thar Republic VR4 lakah pawh an theihna an lantir leh theih tawh a rinawm.

TBL hian MSL kaithar VR4 hneh turin player an nei ṭha tawk a, team ṭha laka an huaisen tawk lohna hi an ngam zawng lakah hrik thlak an tum dawn a, point 100 an score tling leh a nih pawhin a mak lo ang.

MSL-a vawi hnih champion tawh hian league round-ah beisei pha lo mah se semifinal chinah chuan India team enkawla thang bo mek coach H. Laldinsanga a awm theih a beiseiawm tawh avangin champion rinkai an ni leh tawh dawn a, hemi thleng pha tur hian Mapuia tel loin knockout round hi an luh phawt a ṭul a ni.

Republic VR4 tana chhuan tur chu vengchhung mipui a ni a, amaherawhchu an ṭhatna ber tura ngaih mipui hian Vikings leh BCA an hneh loh ṭum pawhin an ṭawiawm ṭha tawk lo. Mipui lamin result ṭha awm hnua MSL4 en an tum a nih chuan inelna a tawp hman theih a, chuvangin ṭan tur an la neih laia an veng club tan an thawhchhuah a ṭul a ni.

Khatla TBL pawhin entu lamah ṭum dang an pha lo a, semi­final thlir chungin tun aṭangin boruak a siam chhoh ṭan a ṭul ang.