Europe-ah pawh City an lian

Manchester City-in Premier League an ang thoin Champions League-ah pawh champion rinkai zinga mi an ni tih pholan nan khualmualah FC Basel chu 4-0 in an sawp.

Thawhlehni zanah City tan Ilkay Gundogan a che ṭha a, Germany in­ter­national midfielder hian goal hnih khungin Ber­nardo Silva leh Sergio Aguero ten an pet goal ve bawk.

St. Jakob-Park a hneh­­na vang hian Pep Guardiola hoten quar­terfinal an luh ngei a rinawm tawh a, second leg hi March 7 zan hian Etihad Stadium-ah khelh a ni ang.

Spanish manager Pep-a chuan, "Minute 180 khelh tur a ni nachungin kan tum ram kan thleng ṭep a ni. Football-ah chuan eng pawh a thlen theih avangin a chiang tawh e chu ka ti lo a, mah se kan result hi chu a ṭha ka ti," tiin an dinhmun a ṭha ti a zep lo.

City nomawi pali chawi turin beiseina an la nei a, hemi chungchang hi sawiin Guardiola chuan, "Premier League champion turin kan dinhmun a ṭha a, point 16 laiin kan fal tawh. Champions League quarterfinal kan hnaih a, League Cup-ah final khelh kan hmabak a, FA Cup-ah pawh quarterfinal thleng thei dinhmunah kan ding. Kan tih theih chu kan match hmabak ṭha taka khelh a ni," tiin a sawi.

Manchester City-in February 19 zan hian Wi­gan Athletic nen FA Cup fifth round an khel ang a, hemi zawh hian Wembley Stadium-ah Arsenal nen February 25 hian League Cup final an khel ang.