Player ṭha nena inlan tum Arsenal
Arsene Wenger-a'n Europa League group stage chinah second team a khelhtir ṭhin. Mahse, Arsenal manager Wenger chuan zanin dar 11:30-a Swedish club Ostersunds nen last 32 an khelh hunah chuan a player ṭha berte an khelh tawh tur thu a sawi.
Amaherawhchu, tun dinhmunah Arsenal hian tlarhma a chhawr turin senior team zingah striker Danny Welbeck chiah an nei a, position dangah erawh an neih ṭhat ber an thawhchhuah pui thung dawn a ni.
Champions League last 16 lut phak lo Atletico Madrid, Borussia Dortmund leh Napoli te pawh Europa League lamah an inlan zui tawh dawn avangin inelna hi a ngaihnawm sawt dawn a, February 22 zanah second leg khelh leh tur a ni ang.
Arsenal dinhmun
Tun hnaiah Arsenal hian Premier League-a palina nih chu Champions League ticket neih nan an hmang ṭhin a, season hmasaah erawh league-a an dinhmun hmangin Europe-a inelna sang ber an khel phak lo. Season kal laiah pawh Manchester khaw club pahnih an tluk lo a, an elpui tura ngaih Liverpool, Chelsea leh Tottenham te an phak lo.
FA Cup aṭanga tla tawh Gunners tan league aṭang UCL khelh tum ai chuan Europa League champion tum chu Champions League khelhna kawng ṭha zawk niin a lang tawh a. League Cup final lut tawh mah se Arsenal ṭantuten Champions League kum zawna an khel pha lo a nih chuan Arsene Wenger an ngaidam thei lo ang.
Gunners-in group stage paltlang turin harsatna an nei lo a, point 13 hmuin group H hmahruaitu an ni. Knockout stage chinah erawh chetsual a thiang tawh lo a, Wenger-a'n player ṭha chhawr a tum pawh hi a mak lo.
Gunners manager Wenger chuan, "FA Cup khelh tur kan nei tawh lo a, indahṭhat a ṭulna a awm tawh lo. A pawimawh ber chu khualmuala hnehna chan a ni," tiin a sawi.
Wenger-a'n North London a enkawl hnuah khualmuala record an neih chhiat ber lai an tawng chho mek, inelna hrang hrangah midang khelmuala an lehluh hnuhnung vawi kuaah vawi khat chiah hnehna an chang thei a ni.
Tlarhma buaina
Lyon aṭanga Arsenal zawmtu Alexandre Lacazette chu Thawhlehni khan a khup hliam zai a ni a, France international hi kar ruk chhung a chawlh a ngai dawn.
Dortmund striker hlui Pierre-Emerick Aubameyang-a'n tun season-ah Champions League a khel tawh a, Bundesliga club hian group stage paltlang zo loin Europa League an khel zui dawn - hei vang hian Gabon international hi Gunners tan chhawr theih a ni dawn lo.
Manchester United midfielder hlui Henrikh Mkhitaryan erawh a inlan thei dawn thung a, chutihrualin Theo Walcott leh Olivier Giroud te an chhuah tawh avangin Gunners hian senior striker zingah Danny Welbeck chiah chhawr tur an nei dawn tihna a ni.
Fimkhur a ngai
Zanina Arsenal lenluhna tur Jamtkraft Arena hi kum 2007-a siam kha niin, mipui 8,500 ṭhut theihna a ni a, khelmualah hian artificial grass phah a ni. London aiin khua a vawh zawk viau bawk avangin mikhual tan chetsual theihna tur hmun a ni.
Swedish club Ostersunds hi English manager Graham Potter kaihhruaina hnuaia khel an ni a, kum 42 mi Potter hian 2011 season aṭang khan Ostersunds hi a enkawl ṭan.
Potter hian hun rei lote chhungin Ostersunds hi a siam danglam, a enkawl tirha fourth division club kha tunah chuan Europa League knockout stage a hruai thleng a, Turkish club Galatasaray te pawh an hneh tawh avangin Arsenal tana zuam sual theih tur an ni.