I League hmahruaitu Neroca

Neroca-in minute 86-naa Aryn Williams goal hmangin Churchill Brothers 1-0 in an hneh a, I League hmahruaitu thar an ni. Manipur club hian match 16 an khelh aṭangin point 31 an hmu a, pahnihnaa awm Minerva Punjab aiin point hnihin hmu tam mah se match hnihin an khel tam zawk.

An sual chhuak
East Bengal-in Minerva Punjab an hneh hnuah Kolkata club chauhin champion beiseina an nei pha lo a, he result hian Manipur club tan ṭan chhan tur a siam sak.

Nimin tlai Khuman Lampak Main Stadium-a inkhelah Neroca-in chak tumin Churchill Brothers an nawr nghal a, an mualah Goan club aiin an huai zawk a, chak duhna thinlung an ngah zawk bawk.

Neroca-in hun tawp hma thlengin chak tumin an nawr a, amaherawhchu hun rei zawk goal an khung thei lo. Hun tawp lamah Australian midfielder Aryn Williams-a'n goal khung theihna hun ṭha chu goal zawnah a tauh lut thei lo a, mah se Neroca midfielder hian talbuai phah loin minute li chiah a awm tawh tihin mawi zetin chakna goal a khung.

Inkhelh banah coach Gift Raikhan chuan, "Kan duh chu point thum a ni a, kan duh tak kan hlawhchhuah avangin table chung berah kan awm. Kan result avangin player-te an inringtawk a, Manipur mipui an hlim bawk," tiin an result-ah a lawm thu a sawi.

Hmabak
Neroca hian Minerva chetsual an chang a, chutihrualin an match hmabak pahnih a la hautak dawn. February 18 hian Mohun Bagan an mikhual ang a, February 27-ah East Bengal an tlawh leh dawn a, champion turin point hloh a thiang tawh lo a, amaherawhchu Kolkata club lian pahnih laka point ruk hlawhchhuah chu a awlsam lo ang.

Churchill Brothers erawh Aizawl FC an hneh hnuah Indian Arrows leh Neroca te an hneh loh avangin pasarihnaah an la awm chhunzawm a, Mizo club lehpelh theihna hun ṭha an hmang ṭangkai bik lo.

Mizo club hi
Aizawl FC hian Zirtawpni tlai dar 5:30 hian coach thar Santosh Kashyap hoin Indian Arrows an hmachhawn dawn a, an tum chu palina nih phak a ni.

Mizo club coach thar Kashyap chuan, "Ka tawnhriat neih tawh hmangin club tan thil ropui tih ka tum ang. Aizawl FC ka zawm thei hi kan inchhuang a, kan tan chona lian tak a ni. Kan match hmabak zel che ṭha turin ruahmanna kan siam a, club tan ka theihna zawng zawng ka hlan ang," tiin result ṭha neihpui a tum thu a sawi.

AFC hian match nga khelh tur an la nei a, point 17 hmu tawhin chhiarkawp dan chuan champion thei an la ni a, amaherawhchu hmahruaitu Neroca hi point 14 zeta an la phak loh avangin an nomawi an humhim theih a rinawm tawh lo a, palina nih phak erawh thil theih a la ni.