Kum 26 mi niin Ryan Mason a chawl

Hull City midfielder Ryan Mason chuan kum 26 mi lek niin inkhelh a chawlhsan thu a puang–January 22, 2017-a Chelsea leh Hull an inhmachhawn ṭumin Mason hi Gary Cahill nen ball tauh an tumna lamah an intauh fuh a, hliam na tak a tuar.

England tana vawi khat inlan ve tawh midfielder hi a hliam vang hian a lu ah zai a ni a, theihtawp chhuahin khelmualah kir leh ngei tum mah se Mason chuan, "Inkhel leh tur chuan risk a sang em em a, chawlh mai hi a fuh zawk a ni," a ti.

Mason hian Tottenham Hotspur aṭangin a career a ṭan a, August 2016 khan pound maktaduai 13-in Hull City chu an player manto ber ni turin a zawm. Mahse, season khat em pawh a khelh tlin hmain hliam a tuar a, Cahill nena an intauh palh ṭum hian khelmual chhungah minute riat zet chu enkawlna pek a ni hial.

London khawpuia St Mary's Hospital-ah a hliam hi zai a ni a, hlawhtling taka zai a nih hnuah a la dam chu a vanneih thu a sawi. Nikum May khan club training zawm ve leh mah se a inkhelh theih leh hun tur sawi a awm lo a, a hunlaia Tigers boss Leonid Slutsky chuan August khan, "Zawhna awm zawk chu football chungchang mai ni loin a nunna dinhmun hi a ni," a ti.

Championship club Hull chuan, "Ryan chuan harsatna a tawh chhung zawnga amah buaipuitute chungah lawmthu a sawi a, thla 12 chhung zeta a chunga hmangaihna lantirtu te chungah hian ba tam tak a nei a ni," tiin thuchhuah an siam.

Mason-a'n a lo khelh tawhna Tottenham manager Maurico Pochettino chuan, "Kum 26 mi lek a ni a, a thluak aṭha em em bawk. Khelmual pawn lama football-ah pawh hlawhtlinna a chhar thei ang tih ka chiang a ni. Ryan, lungphang reng reng suh," tiin a player hlui chu puih a inhuam thu a sawi bawk.

Hetihlai hian Mason tauhtu Gary Cahill leh a khelhna Chelsea te chuan Ryan Mason chawlh a ngai chu pawi an tih thu an sawi a, duhsakna an hlan.