India medal beiseina Sindhu chak zel
PV Sindhu chuan a lo sawi lawk tawh ang ngeiin group stage chinah chuan harsatna lian tham a tawk lo. Tokyo Olympic last 16 chinah erawh a harsa tawh dawn–tukin dar 6:15 hian Denmark nula, world number 12 Mia Blichfeldt nen an intawng zui leh ang.
Nimin zing group J inkhel hnuhnungah Sindhu hian a khingpui Cheung Ngan Yi hi 21-9, 21-16 in a hneh a, hnehna chang tur hian minute 39 bak a mamawh lo, nuamsa takin hnehna a chang tihna a ni.
Game hmasa zawkah a tir lam aṭangin Sindhu hi a kal fal nghal, minute 35 lekin point 21 a hmu tling der. Game hnuhnung zawkah erawh player pahnih an inkhel tawk viau, 14-14 a nih hnuah erawh India nula hian point ruk hmu zawn lehin a fal a, a hawi kir tawh lo.
Beiseina
Rio Olympic-ah khan Sindhu hian final a lut, mahse gold medal match-ah Carolina Marin a ngam lo–silver medal erawh a hlawh chhuak tho. Tun ṭumah hian hliam vangin Marin hi a inlan thei lo, player ṭha dang erawh an inlan thei thung.
Group stage bika a hmachhawn Cheung leh Ksenia Polikarpova te hi chu tun hma lam pawhah a ngam ṭhin an ni a, game hloh miah loin a tlang thei–attacking game a khel ngam bawk a, a inkhel a hmuhnawm hle.
Tokyo Olympic-ah hian India tan gold medal hlawh chhuah ngei a tum a, world champion lai a nih avangin a lakah beisei pawh a sang–tun hnai a tournament khelh dan thlir erawh chuan champion tura dah ngam a harsa thung.
A harsa dawn
Last 16-ah Mia Blichfeldt nen an intawng dawn, player pahnih intawn tawhnaah Sindhu hi vawi li a chak a, ṭum khat a tlawm thung. Kumin bikah chuan vawi khat ve ve an inhneh tawn a, Olympic atan hian chak chiangsa a sawi theih loh.
World number 7 Sindhu chuan, "Ṭha takin ka khel tluang thei hi a lawmawm, match hautak hmachhawn tur chuan hetianga inbuatsaih aia ṭha hi a awm chuang lo. Ka hmabakah hna harsa a tam dawn tih ka hria, chumi paltlang tur chuan ka inpeih," a ti.
Sindhu hi a tlang a nih pawhin quarterfinal-ah Japan nula, world number 5 ni bawk Akane Yamaguchi a hmachhawn thei dawn. Final hmain world number 1 Tai Tzu-ying nen an intawng thei dawn bawk, gold medal match khelh phak pawh a harsa dawn.
