India nulate che fuh thei lo
Tokyo Olympic 2020 khelh mekah India hmeichhe hockey team an che fuh thei rih lo, an group match hmasa pathumah an chak lo vek. Lalremsiami Hmar telna team hian knock out stage lut tur chuan an khelh hmabakah an chak ve ve a ngai tawh dawn.
Nimin zing inkhelah India hi Great Britain lakah 4-1 in an chak lo. Britain midfielder Hannah Martin-i'n goal hnih a khung hnuah Sharmila Devic chuan a sut ṭhen a, mahse champion lai tan Lily Owsley leh Grace Balsdon ten an khung belh.
Vanduaina
India coach Sjoerd Marijne-a'n Nertherland leh Germany laka defensive game an hlawhchham puizia a hria a, world number 4 Britain lakah chuan goal khung tumin an nawr nasa hle.
India hian penalty corner pawh vawi riat ngawt an hlawh chhuak, goal khung theihna remchang ṭha bik an neih hi vawi khat chiah an hlawhtlin pui thei–Mizo nula Remsiami leh captain Rani Rampal te pawhin hun ṭha an insiam hleithei lo.
Great Britain erawhin an hun ṭha neih an chhawr ṭangkai thei zel, India tlarhnung chet fuh loh zar an zo ve bawk. Champion lai hian point ruk hmuin pathumna dinhmun an luah a, quarterfinal lut turin an dinhmun a ṭha ta hle.
Beisei a la awm
Hmahruaitu Netherlands leh Germany te an tlang chiang tawh. Great Britain dinhmun a ṭha tawh bawk, hmunruak pakhat an la inchuh dawn niin a lang. India hian an elpui Ireland leh South Africa te an la hmachhawn dawn, chak bakah Ireland chetsual ngaihchan tel a ngai dawn.
India coach Sjoerd Marijne chuan, "Hun ṭha kan insiam hnem a, khatiang zat chauh goal kan khung thei kha a mak ka ti zawk hle. Hun rei tak inbuatsaihna ṭha tak kan lo neih tawh ataka kan lan chhuahtir thei lo hi a pawi takzet.
"Kan hmabak pahnihah kan chak chuan kan la tlang thei tih kan hria, ka naute hnenah pawh kan hmabak pawimawhzia ka hrilh. Ti hlawhtling tur erawh chuan player zawng zawngin tun aia ṭha zawka an khelh a ngai," tiin a sawi.
