Chelsea-in Koundé an dawr Haaland hming a ri nawn

European champion Chelsea-in squad thuam ṭhat hna an thawk mek a, Sevilla centre back Jules Koundé chu lakluh ngei tumin Spanish club hi indawrna an neihpui mek.

La Liga-a centre back ṭha ber pawla ngaih Koundé hi Euro 2020 khelh zawh taka France squad-ah a tel phak a, Premier League khel tura Spain chhuahsan a pawi ti lo nia sawi a ni.

Kum 22 mi defender hi Tottenham Hotspur pawhin lakluh tumin an dawr nia sawi a ni a, mahse, Champions League khelh a duh avangin Spurs erawh a pan a rinawm loh zawk.

A man a tam
Koundé hian a contract-ah pound maktaduai 68.4-a a chhuah theih tur thu a ziak tel a, hei erawh a tam hret niin a lang. Chelsea lam chuan hei aia hniam zawka lakluh theih an inbeisei.

Chelsea coach Thomas Tuchel-a'n tlarhnung laia khel turin Thiago Silva, Kurt Zouma, Antonio Rüdiger leh Andreas Christensen a nei mek a, Kounde an lalut dawn a nih chuan a tu emaw ber an chhuah a ngai dawn.

Tun dinhmunah chuan man man taka dawrtu an awm a nih chuan Blues hian kum khat chiah contract nei tawh Rüdiger hi chhuahtir an pawi ti lo nia sawi a ni a, Zouma hi Kounde mana kal tel thei dinhmunah a ding mek bawk.

Tu nge Kounde?
France tana vawi hnih inlan ve tawh Kounde hian Bordeaux tan season hnih ngawt a khelh hnuah Ligue 1 club hi a chhuahsan a, kum 2019 khan Sevilla a zawm.

Sevilla tan season hnih chhung match 88 khelin goal ruk a khung a, assist vawi hnih a nei bawk–European defender ṭhang duang ber pawl a ni a, Sevilla-in season thara Champions League an khelh theihna tura player thawhhlawk a ni.

Spanish club a zawm season (2019-20) khan Europa League nomawi a chawi nghal a, UEFA Europa League Squad of the Season-ah a lang phak hial.

Hming langsar
Chelsea-in tlarhma thuam chak an duh a, nipui transfer-ah Borussia Dortmund striker Erling Haaland, Inter Milan chhuanvawr Romelu Lukaku, Tottenham striker Harry Kane leh Bayern Munich fa chuam Robert Lewandowski te nen sawi zawm mek an ni.

Mahse, AC Milan lama Olivier Giroud chhuahtir tawhtu Blues tan a awlsam dawn lo–Haaland-a'n chhuah tumna a neih loh thu a sawi a, Inter-in Lukaku hi 'khawih chet thiang lo' ah an ngai a, Bayern-in Lewy an chhuahtir a rinawm loh bawk.

Spurs chhuahsan duh Kane hi Blues tana lakluh theih ber tur chu niin a lang a, mahse, English striker hi Manchester City-in an duh ve bawk avangin awlsam taka chan erawh a theih dawn loh.

Chhuah tum lo Haaland
Chelsea-in Haaland lakluh duhin Dortmund an dawr tawh a, euro maktaduai 175 bakah Tammy Abraham emaw Callum Hudson-Odoi emaw pek tel an inhuam tih thlengin sawi a ni.

Mahse, Haaland chuan, "Sawi tur vak ka nei lo. Kum thum cham turin contract ka la nei a, Dortmund-a cham hi nuam ka ti bawk. Nimin khan kan inbia tih lohah chuan ka agent nen pawh kan inbe lo a, chu chuan thui tak a hrilhfiahah ka ngai.

"Min lei ngamna zat an sawi pawh ka hria a, thu lengvak mai mai a nih ka beisei–mi pakhat man atan chuan a tam lutuk," a ti a, chhuah a tum loh hmel hle.

Dortmund dinna
German club hian Manchester United lakah Jadon Sancho an chan tawh avangin an player ṭha dang chhuahtir tumna an nei lo nia sawi a ni a, nakkumah Haaland hi a release clause anga pound maktaduai 70 bawr vela chhuahtir pawh an hnial lo zawk.

Kum 21 mi Haaland hian season hmasa khan Dortmund tan inelna hrang hrangah match 41 khelin goal 41 a khung a, assist vawi 12 a nei bawk–United leh Real Madrid pawhin an duh nia sawi a ni.

Hetihlai hian Chelsea chuan Abraham chhuahtir ngei an tum ruh viau a, Arsenal leh West Ham ten duh mah se a man zat pound maktaduai 40 thehchhuah erawh an harsat mai thei–Blues hian West Ham midfielder Declan Rice leh Monaco defensive midfielder Aurélien Tchouaméni an thlithlai bawk.