Djokovic tan 'Golden Slam' a hnai zel

Novak Djokovic chuan mipa tennis player dang ten an la tih ve theih ngai loh ti turin kawng dik a zawh mek. Serbian star hian nimin chawhnu lam khan Alejandro Davidovich Fokina hnehin quarterfinal a lut.

Tokyo Olympic 2020-ah Djokovic hi a champion thei a nih chuan 'Golden Slam' a ni thei dawn, Olympic bakah hian US Open a champion tel erawh a la ngai dawn - season kal laiah Australian Open, French Open leh Wimbledon a lo la tawh bawk.

Nimin last 16 inkhelah Djokovic hian harsatna a tawk lo. A khingpui Spanish player hi 6-3, 6-1 in a hneh, a match lehpekah chuan Kei Nishikori a hmachhawn dawn - Japan tlangval hian Belarus player Ilya Ivashka a lo hneh ve thung.

Djokovic tana hnawksak thei tur zinga mi, world number 5 Alexander Zverev pawh a la chak zel. German tlangval hian a khingpui Nikiloz Basilashvili chu 6-4, 7-6 in a lo hneh ve bawk - medal dawn beisei ngam zinga mi a ni.

Tsitsipas a tla
Champion thei tura rinkai zinga mi Stefanos Tsitsipas erawh last 16 paltlang zo loin a zinkawng a tawp. Greek tlangval hi nimin khan French player Ugo Humbert lakah 2-6, 7-6 (7/4), 6-2 in a chak lo.

Seeded pathumna Tsitsipas hian a ke dinglam hliam vangin set hnihna an khelh lai hian medical time out a hman a ngai a, rei vak lo an chawlh hnuah rawn kir leh thei mah se a beisei angin a khel chhuak thei ta lo a ni.

World number 2 Humbert erawhin fak phu khawpin a khel ṭha thung, set hmasa berah che fuh tawk lo mah se a insiamṭhat hnuah a hawi kir tawh lo - semifinal thleng tur chuan Russia aiawhtu Karen Khachanov a hneh leh a ngai ang.

Khaw lum karah
Japan khawpui Tokyo-ah khua a lum a, ram vawt Russia aṭanga kal Daniil Medvedev tan chuan inkhelh a awlsam lo. Ariake Tennis Park-a inkhelah Medvedev hian Italian mi Fabio Fognini chu 6-2, 3-6, 6-2 in a hneh hram.

Seeded pahnihna Medvedev chuan, "Tokyo ka thlen tawh china khaw lum leh boruak hnawng ka tih ber ṭum a ni hial ang. Set khatna kan khelh lai aṭang khan thawk a harsa ka ti, a hnu lamah erawh a tawrh dan ka thiam ta deuh," a ti.

Set hnihna leh set thumna an khelh inkarah hian khaw lum vangin minute 10 an chawl lailawk a, hei hi match khelh rei zawngah chhiar tel a ni lo - Russian tlangval hian chak turin darkar hnih leh minute 25 hun a hmang.