Olympic Boxing : Pooja Rani a chak awlsam

Olympic hmeichhe boxing-ah nimin khan Pooja Rani a inlan a, Haryana hmeichhe boxer hian unanimous decision-in Ichrak Chaib a hneh. Kum 30 mi Pooja hian quarterfinal-ah seeded number 2 Li Qian a hmachhawn dawn a, hnehna a chang thei a nih chuan medal a la pha dawn tihna a ni.

Vawiin hian super heavyweight (+91kg) ah Satish Kumar a inlan dawn a, Uttar Pradesh boxer hian chawhma dar 8:48 hian Jamaican boxer Ricardo Brown a hmachhawn ang. Kum 31 mi Brown hi kum 1996 hnua Jamaica tana boxing-a tel leh hmasa ber a ni a, Satish tan hian a awlsam dawn lo.

A harsa lo
Rani Pooja hian tawnhriat ṭha tak a nei a, Asia khawlmualpui inelnaah medal ṭum nga a la tawh a, heng zinga pahnih hi gold a ni. Kumin khan Dubai-ah Asian Championships neih a ni a, hetah hian gold a la a, inringtawk takin Olympic a hmachhawn.

Pooja hian Algerian boxer Ichrak Chaib lakah bul a ṭan ṭha a, round hmasa berah judge hoin 10-9 in an chaktir vek. Second round-ah kum 20 mi Ichrak-i'n na takin a rawn nawr let a, Indian boxer Pooja hian a tawnhriat a hmang ṭangkai a, talbuai loin inhnek a thunun chhunzawm.

Judge pangain Pooja bawk an chaktir avangin round thumnaah chuan chak tur zawk a chiangah a ngaih theih a, Algerian boxer tan chak turin knockout a ngai. Indian boxer hian fimkhur takin round thumna a khel a, judge pangaten an chaktir leh vek bawk.

Hmabak Li Qian
Pooja khingpui tur Li Qian hian nimin khan unanimous decision-in Irish boxer Aoife O'Rourke a hneh. Chinese boxer Li Qian hi kum 31 mi a ni a, Pooja aiin record a nei ṭha zawk.

Li Qian World Championship-ah gold leh silver a la tawh a, Asian Championships-ah gold pahnih leh silver pakhat a lak tawh bakah Asian Games-ah bronze a la tawh. Rio 2016 khan Chinese boxer hian bronze medal a la bawk.

Amaherawhchu Chinese boxer Li Qian hi medal lakna hi 2020 hmalam vek a ni a, tun ṭumah hian seeded number 2 ni bawk mah se Pooja tan beisei bo a ni lo.